Tensione u shënuan pranë ambienteve të Kuvendit, në momentin kur deputeti i PS-së, Erion Braçe, po drejtohej drejt zyrave të Kryesisë së Kuvendit. Disa protestues iu afruan deputetit, ndërsa njëri prej tyre tentoi ta godiste me një tabelë. Situata u ndërpre pas ndërhyrjes së menjëhershme të efektivëve të policisë dhe punonjësve të sigurisë, të cilët u përpoqën të largonin Braçen nga turma.
Pak orë më vonë, në një lidhje për “Shqipëria Live”, Braçe dha versionin e tij për atë që kishte ndodhur. Deputeti tha se teksa po hynte në zyrën e tij, kishte dëgjuar thirrje dhe ofendime nga protestuesit. Sipas tij, ai vendosi t’u afrohej me qëllim që të dëgjonte shqetësimet e tyre.
“Unë isha duke hyrë në zyrën time, në zyrat e Kryesisë së Kuvendit. Kam dëgjuar aty thirrje, sharje, fyerje. Termi ‘hajdut’ ishte më i përdorur. Për shkak të qëndrimeve që kisha për Territorialen, jam drejtuar drejt tyre me idenë që dua t’ju dëgjoj”, u shpreh Braçe. Ai tregoi se gjatë momentit të përplasjes kishte komunikuar edhe me një prej protestueseve, me të cilën, sipas tij, kishte diskutuar për çështje që lidhen me ndarjen e re territoriale.
Braçe tha gjithashtu se në mesin e protestuesve kishte persona me profile të ndryshme, ndërsa gjatë deklaratës së tij iu referua edhe Partisë Mundësia dhe një prej figurave të saj politike. Në vijim, deputeti socialist e lidhi incidentin me detyrën e tij parlamentare, duke theksuar se funksioni i deputetit dhe ushtrimi i mandatit kushtetues nuk duhet të pengohen.
“Unë bëj deputetin e Republikës së Shqipërisë dhe bëj një detyrë kushtetuese. Nuk mund të cenohet nga askush. Deputeti është edhe një njeri politik. Dhe të drejtat e një deputeti nuk mund të kufizohen”, deklaroi Braçe. Incidenti ndodhi në një moment tensioni mes protestuesve dhe përfaqësuesve politikë pranë ambienteve të Kuvendit.