Në 25-vjetorin e sulmeve terroriste të 11 Shtatorit, kryetari i Partisë Republikane, Fatmir Mediu, ka përcjellë një mesazh përkujtimor, duke nderuar viktimat e sulmit dhe heronjtë që humbën jetën në përballjen me terrorizmin. “25 vjet më parë, bota ndryshoi përgjithmonë”, shprehet Mediu, duke e cilësuar 11 Shtatorin si një sulm terrorist jo vetëm ndaj Shteteve të Bashkuara të Amerikës, por edhe ndaj vlerave dhe vendeve të lira.
Mediu thekson se kjo ditë mbetet një moment kujtese dhe reflektimi për miliona njerëz në mbarë botën. Ai shpreh respekt për viktimat e pafajshme dhe nderon ata që sakrifikuan jetën e tyre në një nga ditët më të errëta të historisë moderne.
“Është një ditë ku kujtojmë forcën, unitetin dhe kurajon që u shfaqën përballë terrorizmit”, shprehet ai, duke përcjellë gjithashtu solidaritetin me familjarët e viktimave. Në mesazhin e tij, Mediu vë në dukje edhe qëndrimin e Shqipërisë në krah të Shteteve të Bashkuara në luftën kundër terrorizmit.
Postimi i plotë
25 vjet më parë, bota ndryshoi përgjithmonë.
11 Shtatori ishte një sulm terrorist jo vetëm mbi Amerikën, por për të gjitha vëndet e lira.
Ajo ditë do të mbetet një ditë kujtese dhe reflektimi për miliona njerëz në botë. Sot kujtojmë viktimat e pafajshme që humbën jetën nga terrorizmi, nderojmë heronjtë që sakrifikuan jetën e tyre dhe kujtojmë forcën, unitetin dhe kurajon që u shfaqën në një nga ditët më të errëta të historisë moderne.
Në këtë ditë, mendimet dhe respekti im shkojnë për të gjithë familjarët e viktimave. Shqiptarët janë krenar që kanë qëndruar në krah të SHBA-ve në betejën kundër terrorizmit.