Ferit Hoxha: Të rinjtë do të jenë brezi i parë që do ta përjetojë Shqipërinë si anëtare të BE-së

Ministri për Evropën dhe Punët e Jashtme, Ferit Hoxha, së bashku me kryeministrin Edi Rama, morën pjesë në një dialog të hapur me 150 aktivistë të rinj nga Shqipëria, Maqedonia e Veriut dhe Mali i Zi, në kuadër të RinCamp 2026, ku në fokus ishte procesi i integrimit europian dhe roli i të rinjve në këtë rrugëtim.

Gjatë panelit të organizuar nga Agjencia Kombëtare e Rinisë, Hoxha theksoi se anëtarësimi në Bashkimin Europian është një objektiv kombëtar që kërkon angazhimin e të gjithë shoqërisë, veçanërisht të brezit të ri.

“Ky është qëllimi ynë kombëtar, misioni ynë i përbashkët dhe mundësia më e mirë për të rinjtë. Askush nuk përjashtohet; të gjithë kanë një rol për të luajtur. Ky brez do të jetë i pari që do ta përjetojë Shqipërinë si shtet anëtar të Bashkimit Europian”, u shpreh ministri.

Ai nënvizoi se procesi i integrimit nuk zhvillohet vetëm në institucionet europiane, por fillon në vetë Shqipërinë përmes zbatimit të reformave.

“Evropa fillon këtu. Në Bruksel merren vendimet, por reformat bëhen këtu. Ndikimi i gjithçkaje që vendoset në Bruksel reflektohet në Shqipëri”, deklaroi Hoxha.

Ministri i Jashtëm shtoi se çdo qytetar mund të japë kontributin e tij në afrimin e Shqipërisë me Bashkimin Europian, duke theksuar se përgjegjësia e qeverisë është ta çojë vendin drejt anëtarësimit, ndërsa brezi i ri do të ketë misionin të përfaqësojë dhe mbrojë interesat e Shqipërisë brenda familjes europiane.