Festa e Birrës në Korçë kremton 20-vjetorin, edicioni jubilar çel siparin më 12 gusht në Polin e Eventeve në Drenovë

Përmes një postimi në rrjetet sociale, Kryeministri Edi Rama ka njoftuar mbajtjen e një prej ngjarjeve më të pritura të sezonit veror. “Korça Beer Fest 2026” vjen këtë vit me edicionin e tij jubilar të 20-vjetorit, duke e kthyer qytetin e serenatave në kryeqendrën më festive të vendit.

Eventi do të shtrihet në 5 net radhazi, nga data 12 deri më 16 gusht, në hapësirën e re të Polit të Eventeve në Drenovë.

Aktiviteti do të ofrojë për të gjithë vizitorët vendas dhe turistët e huaj një program të pasur me muzikë live, artistë të njohur të skenës, pije, gatime tradicionale të zonës dhe atmosferën mikpritëse karakteristike korçare.

Organizatorët bëjnë me dije se hyrja do të jetë pa biletë për të gjitha netët e festivalit, duke ftuar publikun të bëhet pjesë e këtij kremtimi të veçantë 20-vjeçar.