FMN: Europa, rritje ekonomike 3.1% në 2017-ën

Fondi Monetar Ndërkombëtar ka publikuar projeksionet e ekonomisë globale të përditësuara. Në krahasim me projeksionet e fundit, ato të muajit Tetor, institucioni ka vendosur të mos e rishikojë ecurinë e ekonomisë globale, për shkak të pasigurive që mbretërojnë aktualisht.

Sa i përket tregjeve në zhvillim në Europë, ku përfshihen: Shqipëria, Bosnje Hercegovina, Bullgaria, Kroacia, Hungaria, Kosova, Maqedonia, Mali i Zi, Rumania, Polonia, Serbia dhe Turqia, projeksionet e institucionit flasin për një zgjerim të ekonomisë me 3.1% përgjatë këtij viti, dhe me 3.2% vitin e ardhshëm.

Sa i përket vitit që lamë pas, Fondi Monetar Ndërkombëtar flet për një rritje në 2.9%, nga 3.7% që ishte në vitin 2015. “Aktiviteti ekonomik projektohet të rifitojë hapin në 2017-ën dhe 2018-ën, sidomos në tregjet dhe ekonomitë në zhvillim”, citon institucioni në raportin e fundit.

Gjithsesi, vijon institucioni, ka shumë dyshime rreth këtyre projeksioneve, për shkak të pasigurisë që rrethon botën sot, kryesisht falë administratës së re amerikane. Rritja e ekonomisë globale, projektohet në 3.4% për këtë vit dhe 3.6% për vitin e ardhshëm, në nivele të pandryshuara në krahasim me projeksionet e tetorit.

Ndërkohë që Fondi Monetar Ndërkombëtar flet për një rritje të rajonit me 3.1% përgjatë këtij viti, të gjitha projeksionet e tjera, përfshirë edhe vetë ato të FMN-së, tregojnë se, ekonomia shqiptare do të rritet me një hap ndjeshëm më të lartë se rajoni, me të paktën 0.4 pikë përqindje më shumë.