Forbes: Shqipëria një nga 6 vendet e vetme të NATO-s që mbështesin publikisht ofensivën e SHBA-së dhe Izraelit

Vetëm gjashtë vende të NATO-s kanë dalë hapur në mbështetje të operacioneve ushtarake të SHBA-së dhe Izraelit kundër Iranit, ndërsa shumica e të tjerëve preferojnë një qëndrim neutral ose kritik, sipas një raporti të Forbes.

Mes vendeve që kanë shprehur mbështetje janë: Shqipëria, Kosova, Maqedonia e Veriut, Lituania, Letonia dhe Republika Çeke. Zyrtarët e tyre argumentojnë se rreziku nga programi bërthamor i Iranit dhe destabilizimi i Lindjes së Mesme janë arsyet kryesore për qëndrimin pro-operacioneve.

Kryeministri shqiptar, Edi Rama, lidhi mbështetjen e Shqipërisë me tensionet diplomatike të mëparshme me Iranin, duke e prezantuar vendin si një aleat të fortë të Shteteve të Bashkuara. Në një postim në rrjetin X, Rama deklaroi: “Ne mbështesim Shtetet e Bashkuara në mbështetjen ushtarake të Izraelit” dhe dënoi sulmet kibernetike të Iranit ndaj Shqipërisë, të cilat çuan në ndërprerjen e marrëdhënieve diplomatike në 2022.

Ndërkohë, Presidentja e Kosovës, Vjosa Osmani, Ministri i Jashtëm i Maqedonisë së Veriut, Timčo Mucunski, dhe zyrtarë nga Lituania, Letonia dhe Çekia kanë bërë të qartë mbështetjen e tyre, duke theksuar se qëllimi është frenimi i programit bërthamor iranian dhe ruajtja e stabilitetit rajonal. Shumica e vendeve të tjera të NATO-s, përfshirë Danimarkën, Finlandën dhe Luksemburgun, kanë qëndruar neutralë, ndërsa disa, si Itali dhe Spanjë, janë shprehur kritikisht ndaj sulmeve.