FOTO/ Ministri Nufi pret ambasadorin amerikan Wendt: Shqipëria, aleate e besuar për sigurinë dhe paqen

Ministri i Mbrojtjes, Ermal Nufi ka zhvilluar një takim me ambasadorin e ri të Amerikës në Shqipëri, Eric Wendt, ku në fokus ka qenë partneriteti mes dy vendeve në fushën e mbrojtjes dhe sigurisë. Përmes një postim në Facebook, Nufi theksoi se Shqipëria dhe Shtetet e Bashkuara qëndrojnë “krah për krah” për lirinë, sigurinë dhe paqen, duke e cilësuar SHBA-të si partner të pazëvendësueshëm të Shqipërisë në mbrojtje dhe siguri.

Postimi i plotë

Me Shtetet e Bashkuara, Shqipëria qëndron krah për krah për lirinë, sigurinë dhe paqen.

SHBA janë partner i pazëvendësueshëm i Shqipërisë në mbrojtje dhe siguri, ndërsa vendi ynë i sjell këtij partneriteti një pozicion gjeografik me rëndësi, besueshmëri dhe vullnet të palëkundur për të bashkëpunuar.

Korridori VIII, Porto Romano, Baza Ajrore Kuçovë dhe kapacitetet tona për Mbështetjen e Vendit Pritës forcojnë arkitekturën dhe lëvizshmërinë e Aleancës në Evropën Juglindore.

Nga mbështetja për Ukrainën 🇺🇦 dhe prania në #KFOR, tek shumë iniciativa shumëkombëshe, apo vendimi për pjesëmarrjen në Forcën Ndërkombëtare të Stabilizimit në Gaza – Shqipëria 🇦🇱 dëshmon se është tashmë një aleate e besuar dhe e aftë të kontribuojë për sigurinë dhe paqen.