FOTO/ Mirela Kumbaro reagon pas lajmeve: Bënja ishte në kaos, sot po transformohet në harmoni me natyrën

Deputetja e qarkut të Gjirokastrës si dhe drejtuese politike e PS-së në këto zona, Mirela Kumbaro, ka reaguar ndaj debatit të ditëve të fundit për gjendjen e Ujërave Termale të Bënjës në Përmet, duke sqaruar se punimet në këtë destinacion turistik nuk kanë përfunduar dhe se aktualisht po zhvillohet faza e testimeve teknike. Sipas Kumbaros, boshatisja dhe rimbushja e herëpashershme e vaskave termale është pjesë e procesit të kontrollit të prurjeve të ujit dhe nivelit të tyre, procedurë që po kryhet nga inxhinierët përgjegjës të projektit.

Ajo thekson se rikualifikimi i zonës, i realizuar përmes një investimi të Fondit Shqiptar të Zhvillimit, përfshin rrugë të reja aksesi, ambiente shërbimi, hapësira rekreative dhe infrastrukturë për zhvillimin e aktiviteteve kulturore dhe promovimin e traditës përmetare. Kumbaro u bën thirrje qytetarëve të mos gjykojnë mbi bazën e publikimeve në rrjetet sociale, por ta vizitojnë nga afër Bënjën, duke theksuar se ndërhyrjet janë realizuar me materiale në harmoni me natyrën dhe peizazhin e zonës.

Sipas saj, këtë fundjavë Ujërat Termale të Bënjës do të mirëpresin një aktivitet kulturor me artistë, muzikë tradicionale përmetare dhe aktivitete argëtuese për vizitorët, ndërsa vizitorët kanë nisur tashmë të shfrytëzojnë vaskat termale edhe gjatë fazës së testimeve.

Postimi i plotë

Fotot e mëposhtme nga Ujërat termale të Bënjës janë të SOTMET dhe kush do të shohë me sytë e logjikës dhe jo me lentet e spekulimit, e ka shumë të lehtë të bëjë dallimin mes transformimit që ka pësuar Bënja sot, dhe kaosit të deridjeshëm. Por nuk është thënë ASNJËHERË që kantieri ka përfunduar, sepse janë duke u bërë testimet e nevojshme me prurjet e ujit, nivelin e vaskave, dhe boshatisja e herëpashershme e vaskave është pjesë e këtij procesi.  Sa flasim, vaskat po mbushen sërish, në mënyrë të kontrolluar, sepse inxhinierët (ata të vërtetët, jo gjithologët) e dinë saktësisht se si kryhet kjo punë.

Por këtë fundjavë ju njoftoj se skena natyrore dhe ajo infrastrukturore e re e Bënjës do të kthehet në një skenë të madhe kulturore ku nuk do të mungojnë të gjitha zbavitjet, artistët, dhe sidomos muzika unikale përmetare, ndërsa pikërisht tani që po shkruaj këto rreshta, vizitorët janë duke shijuar vaskat e Bënjës, në kontrast me stuhinë e statuseve të rrjeteve sociale!

Thënë kjo, tani dy fjalë, si deputete e asaj zone: Prej ditësh dëgjoj e lexoj turlilloj komentesh mbi banjat e Bënjës në Përmet, me një dëshirë malinje, jo vetëm për të bërë si ekspertë që nuk jemi, por edhe për të nxirë një destinacion të jashtëzakonshëm, ku njerëzit janë shpirtbardhë, punëtorë e krijues si rrallëkund – dhe këtu e kam fjalën për përmetarët që më kanë dhënë mësimet më të vyera në jetë e me të cilët kemi ndërtuar e bërë aq shumë punë – për ta bërë Përmetin destinacionin e preferuar, pikërisht atë Përmet që deri para 7-8 vitesh, përveç përmetarëve që riktheheshin te familjet, apo ndonjë zyrtari që shkonte me shërbim, nuk i shkonte mendja njeriu ta shkelte! As tabelë tek Ura e Leklit nuk kishte në vitin 2015 që të tregonte se ku binte Përmeti!

Prej muajsh kemi thënë e treguar se zona e “Ujrave termale të Bënjës” është në kantier rikualifikimi, falë një investimi dhe projekti të bërë nga Fondi Shqiptar i Zhvillimit me rrugë aksesi të reja, me mjedise shërbimi të reja, me hapësira rekreative për çlodhje e për aktivitete që krijojnë edhe mundësi për festa kulturore e promovuese të traditës dhe produkteve të jashtëzakonshme përmetare. Të gjitha ndërhyrjet siç shihen në foto apo siç mund t’i shijoni kur ta vizitoni janë bërë me materiale në harmoni me natyrën dhe brenda estetikës së peizazhit që Perëndia i ka dhuruar asaj zone ku shekujt kanë lënë gjurmët e tyre njerëzore.

Ndërkohë puna ende s’ka mbaruar. Janë duke u bërë testimet e nevojshme me prurjet e ujit, nivelin e vaskave, dhe boshatisja e herëpashershme e vaskave është pjesë e procesit. Dhe tani boll e patë Përmetin e Bënjën me syzet e errëta të fejsbukut gjitholog, ejani në Përmet të shijoni Vaskë Currin, bash aty te vaskat termale me ujë.