FOTO/ Pasaportë europiane? Gazment Bardhi tregon për standardet dhe premtimet e qeverisë që nuk po dalin

Kreu i grupit parlamentar të PD-së, Gazment Bardhi, ka publikuar një seri grafikësh ku ngre pikëpyetje mbi standardet e shërbimeve publike në Shqipëri, në një kohë kur vendi synon anëtarësimin në Bashkimin Europian.

Në fokus është shëndetësia, ku sipas të dhënave të referuara në grafikë, 48% e shpenzimeve shëndetësore paguhen drejtpërdrejt nga qytetarët, kundrejt rreth 15% në BE. Bardhi evidenton gjithashtu diferencën në shpenzimet reale për shëndetësinë krahasuar me mesataren europiane.

Në arsim, postimi i referohet rezultateve të PISA 2025, ku Shqipëria ka 408 pikë në lexim, ndërsa mesatarja e OECD-së është 461 pikë. Grafiku thekson gjithashtu se një në dy nxënës 15-vjeçarë nuk arrin nivelin bazë të leximit.

Bardhi e shoqëron publikimin me pyetjen: “Pasaportë Europiane?! Po spitalet, po shkollat?”, duke e vendosur debatin për integrimin europian përballë gjendjes së shërbimeve publike.

Në një tjetër grafik, ai rikthen edhe deklaratat e Edi Ramës për afatet e mbylljes së negociatave me BE-në, duke e lidhur procesin e integrimit jo vetëm me negociatat, por edhe me standardet që prekin drejtpërdrejt qytetarët.