Gazi lotsjellës ndaj protestuesve, Lamallari: I certifikuar nga kompanitë prodhuese

Ministri i Brendshëm, Besfort Lamallari, ka deklaruar në Kuvend se lëndët e përdorura nga Policia e Shtetit për të neutralizuar e protestuesit janë të gjitha të certifikuara.

Lamallari shtoi se protesta po bëhet nga mercenarë të paguar dhe i bëri thirrje opozitës të largojë prej saj njerëzit me kapuçë.

“Konfirmoj që lëndët e përdorura nga Policia e Shtetit janë lëndë speciale irrituese profesionale për vetëmbrojtje dhe neutralizim të personave të dhunshëm, të certifikuara dhe të përdorura nga forcat policore në vendet e Bashkimit Europian dhe në Shtetet e Bashkuara të Amerikës.

Lajmi nuk është spraj i përdorur. Lajmi është që partia e “molotovarëve”është shndërruar në parti të “skuthave”, që hedhin gurin dhe fshehin dorën. Nuk mund të pretendoni se përfaqësoni zërin e protestës, ndërsa toleroni njerëz me kapuçë dhe individë që kërkojnë të nxisin dhunë. Largoni njerëzit me kapuçë përpara se t’i largojë Policia. Policia e Shtetit po bën detyrën e saj konform ligjit për të garantuar mbarëvajtjen e protestës. Nuk keni asnjë të drejtë morale t’i jepni leksione Policisë së Shtetit për mënyrën se si garanton rendin dhe sigurinë”, tha Lamallari.