Gonxhja sulmon opozitën: Vendi nuk do të kthehet më në kaos, “Shqipëria 2030” nuk ndalet

Ministri i Turizmit, Kulturës dhe Sportit, Blendi Gonxhja, teksa ka postuar foto të Berishës teksa qëndron në foltoren e seancës plenare, akuzon opozitën për pengimin e zhvillimit të vendit dhe integrimit europian të Shqipërisë. Ai e cilëson opozitën si “një energji negative e tragjike” që sipas tij, prej dhjetorit të vitit 1990 ka penguar progresin e vendit. Ai përdor tone të ashpra, duke e përshkruar atë si “shpifëse, përçarëse, luftënxitëse dhe vrasëse”, ndërsa shton se kjo është një “hije e kobshme mbi shpresat e një kombi”.

Postimi i plotë

Prej dhjetorit 1990 kjo sagomë e zezë, kjo energji negative e tragjike që e përndjek si fantazëm këtë vend, kjo fatkeqësi që mishëron në tërë qenien e vet demoniake kujtime të liga dhe ogure të errëta, si shpifës, si përçarës, si luftënxitës e si vrasës, si një hije e kobshme mbi shpresat e një kombi që iu plakën ëndrrat, sot akoma dhe më gjakndjellës se kurrë!

Shqipëria pa opozitë, me këtë thikë në shpinë, 36 vjet ngulur si plagë e pambyllur, do të vuajë ende, por nuk do të kthehet më kurrë në kaos e zi!

Shqipëria do ta kapërcejë edhe këtë atentat ndaj shtetit e institucioneve! Historia do i gjykojë ata që e vonuan, që e penguan integrimin europian, që e dhunuan interesin kombëtar, por ta harrojnë se do ta mposhtin dot projektin për Shqipërinë 2030!