Ish-i dërguari i Shteteve të Bashkuara për dialogun Kosovë-Serbi, Richard Grenell, ka reaguar ndaj deklaratës së komisioneres evropiane për Zgjerimin, Marta Kos, lidhur me vendimin e Dhomave të Specializuara të Kosovës ndaj ish-krerëve të UÇK-së.
Kos kishte kërkuar respektimin e vendimeve të gjykatës me seli në Hagë, duke theksuar gjithashtu të drejtën e të dënuarve për apelim.
Në një reagim të publikuar në platformën X, Grenell shprehu qëndrim të kundërt, duke kritikuar ashpër funksionimin e institucioneve evropiane dhe vetë Dhomat e Specializuara.
“Jo. Gjashtë vjet mbajtje në burg të dikujt për diçka që, sipas jush, ka ndodhur 25 vjet më parë është e turpshme”, shkroi Grenell.
Ai argumentoi se Evropa duhet të rishikojë institucionet dhe politikat e saj, ndërsa procesin gjyqësor e cilësoi si “aktivizëm të elitave”.
“Evropa duhet të reformojë institucionet e saj dhe politikat e saj. Kjo nuk është drejtësi; është aktivizëm i elitave”, deklaroi ai.
Në përfundim të reagimit, Grenell kërkoi ndërprerjen e financimit për këto institucione, duke i cilësuar ato si “gjykata radikale”.
“Është edhe një njollë tjetër për Evropën. Financimi për këto gjykata radikale duhet të ndërpritet menjëherë”, shkroi ish-i dërguari amerikan.
