Haga i dënoi, por 4 ish-krerët e UÇK-së shpallen nga Bashkia e Tiranës si ”Qytetarë Nderi”

Hashim Thaçi, Kadri Veseli, Jakup Krasniqi dhe Rexhep Selimi janë shpallur këtë të martë ”Qytetarë Nderi” të Tiranës. Vendimi është miratuar unanimisht nga Këshilli Bashkiak i Tiranës, dhe erdhi me propozim të kryebashkiakut Erion Veliaj.

Këshilltari socialist në Bashkinë Tiranë, Eridian Salianji, nuk ishte i kënaqur me numrin prezent të këshilltarëve të opozitës në sallë gjatë momentit të votimit. Ai theksoi se shpallja ‘qytetar nderi’ e 4 ish-krerëve të UÇK duhet të ishte miratuar me 61 vota pro.

Vlerësimi është bërë në nderim të kontributit dhe rolit të katër figurave në historinë e Kosovës dhe në luftën e Ushtrisë Çlirimtare të Kosovës (UÇK). Me këtë vendim, Bashkia e Tiranës vlerëson kontributin e tyre në proceset historike që lidhen me Kosovën dhe luftën për çlirimin e saj. Vendimi vjen në një moment të ndjeshëm për ta, pasi Dhomat e Specializuara në Hagë i dënuan me 81 vite burg në total.

Motivacionet për drejtuesit e UÇK-së:

Hashim Thaçi

Për kontributin e çmuar në Luftën Çlirimtare të Kosovës, në përfaqësimin politik të saj dhe në rrugëtimin e Kosovës drejt lirisë e pavarësisë, me mbështetjen e vendosur të SHBA-së dhe partnerëve euroatlantikë. Për lidhjen e veçantë me Tiranën dhe forcimin e marrëdhënieve ndërmjet Kosovës dhe Shqipërisë.

Kadri Veseli

Për kontributin e çmuar në Ushtrinë Çlirimtare të Kosovës dhe në rrugëtimin e Kosovës drejt lirisë e pavarësisë, me mbështetjen e vendosur të SHBA-së dhe partnerëve euroatlantikë. Për lidhjen e veçantë me Tiranën dhe përkushtimin ndaj afrimit e bashkëpunimit ndërmjet Kosovës dhe Shqipërisë.

Jakup Krasniqi

Për kontributin e çmuar në Luftën Çlirimtare të Kosovës, në përfaqësimin politik të saj dhe në rrugëtimin e Kosovës drejt lirisë e pavarësisë, me mbështetjen e vendosur të SHBA-së dhe partnerëve euroatlantikë. Për lidhjen e tij të hershme me Tiranën, si një nga qendrat e mbështetjes politike e qytetare për Kosovën.

Rexhep Selimi

Për kontributin e çmuar në Ushtrinë Çlirimtare të Kosovës dhe në rrugëtimin e Kosovës drejt lirisë e pavarësisë, me mbështetjen e vendosur të SHBA-së dhe partnerëve euroatlantikë. Për lidhjen e veçantë me Tiranën, kryeqytetin që në ditët e luftës qëndroi pranë Kosovës dhe popullit të saj.