Hallet e popullit në Kuvend, Berisha: Jeni e vetmja qeveri në Europë që i hiqni subvencionet e naftës fermerëve

Seanca e sotme pleanre në Kuvend është që deputetët të flasin për problemet e qytetarëve. Sali Berisha kritikoi ashpër qeverinë ‘Rama 4” për mungesën e mbështetjes ndaj qytetarëve dhe veçanërisht ndaj fermerëve. Ai ngriti pikëpyetje mbi organizimin e seancave për problemet e popullit, duke akuzuar qeverinë për hipokrizi dhe keqmenaxhim.

Sipas tij, heqja e subvencioneve për naftën në një kohë kur çmimet janë në kulm përbën një akt të papërgjegjshëm që çon drejt falimentimit të fermerëve dhe braktisjes së vendit prej tyre. Berisha theksoi se kjo politikë po i detyron qytetarët të emigrojnë drejt vendeve të largëta si Irlanda, Australia apo Alaska.

Berisha krahasoi gjithashtu situatën në Shqipëri me vendet e rajonit dhe Evropës, duke pretenduar se fermerët në këto vende përfitojnë subvencione të konsiderueshme për karburantin, ndërsa në Shqipëri ato janë hequr.

“Çfarë seance bëni ju për hallet e qytetarëve, kur ai thoshte: ‘Ne marrim rrugët e dheut, sepse ju vidhni’? Si mund të flisni për hallet e popullit dhe të organizoni edhe seancë?! Si mund të flisni ju, kur jeni e vetmja qeveri në Europë e cila, në kulmin e çmimeve të naftës dhe gazit, ua hiqni fshatarëve subvencionet për naftën?! A ka cinizëm më të madh se ky? A ka akt më të papërgjegjshëm?

Kjo është një politikë jo vetëm e falimentimit të fermerëve, por edhe e largimit të tyre. Ju vidhni, ndërsa ata marrin rrugët e dheut: drejt Irlandës, Australisë, Alaskës, vendeve më të largëta. Si ka mundësi që, në kulmin e shtrenjtimit të naftës, u thoni atyre se ua keni hequr edhe subvencionet e saj, subvencion që e kanë të gjitha vendet përreth?!

Në Maqedoni nafta shitet me 1 mijë e 500 në pompë, por fermerëve u jepet me çmim nën 1 mijë. Po kështu ndodh në çdo vend europian. Ndërsa kreu juaj thotë se Europa e ka hequr këtë subvencion. Fermerët në vende të tjera marrin qindra milionë në mbështetje, ndërsa ju i vodhët të gjitha paratë e IPARD-it. Jeni të vetmit në rajon që nuk përfitoni nga IPARD-i”, tha ndër të tjera Berisha.