Hetimi ndaj Vlora Hysenit, ekspertët: Çështja duhet të ndahet nga funksionimi i SHISH-it

Ish-drejtuesja e Shërbimit Informativ Shtetëror, Vlora Hyseni, është vendosur nën masë sigurie nga Gjykata e Posaçme, në kuadër të një hetimi për dyshime mbi veprat penale të përkrahjes së autorit të krimit dhe zbulimit të akteve apo të dhënave sekrete.

Masa e sigurisë u bë publike ndërsa Hyseni ndodhej në Baku, në një vizitë pune. Hetimi është pjesë e një procedimi të nisur më herët, ndërsa çështja ka rikthyer në vëmendje edhe mënyrën se si duhet të menaxhohen raste të tilla kur në qendër të hetimit është një drejtues i një institucioni të sigurisë kombëtare.

Eksperti i çështjeve të sigurisë, Xhavit Shala, vlerëson se duhej të gjendej një zgjidhje institucionale që të garantonte hetimin, por njëkohësisht të mbronte reputacionin e institucionit. “Nuk do isha dakord për një mënyrë veprimi të tillë për sa i përket reputacionit të shërbimit. Janë probleme të mprehta. Një mënyrë tjetër zgjidhjeje do të ishte t’i kërkohej dorëheqja. Pavarësisht situatës, kjo ngjarje nuk e eklipson punën e shërbimit. Vlora Hyseni, në krye të këtij shërbimi, ka marrë vlerësime nga ndërkombëtarët”, tha Shala.

Një nga elementët më sensitive të hetimit lidhet me dyshimet për zbulimin e të dhënave sekrete. Megjithatë, në këtë fazë bëhet fjalë për akuza dhe dyshime të hetimit dhe jo për një vendim përfundimtar mbi përgjegjësinë penale të Hysenit. Sipas Shalës, hetimi ndaj ish-drejtueses nuk duhet të interpretohet automatikisht si problem i gjithë strukturës së SHISH.

“Nuk mendoj se janë shitur informacione që cenojnë sigurinë kombëtare. Jo për ta thjeshtëzuar, por mendoj se është një përzierje mes raporteve personale dhe emocionale me funksionin”, u shpreh eksperti. Çështja merr një tjetër dimension për shkak të rolit që SHISH ka në sistemin e sigurisë kombëtare dhe bashkëpunimit me shërbimet partnere. Për këtë arsye, sipas Shalës, krahas hetimit penal është i nevojshëm edhe një proces i brendshëm sqarues, si dhe komunikim i qartë me partnerët ndërkombëtarë.

“Ka nevojë për një hetim të brendshëm të institucionit dhe të sqarohen partnerët, është shumë e rëndësishme që partnerët të mbeten të sqaruar. Jemi anëtarë të NATO-s”, tha Xhavit Shala. Në vijim, hetimi pritet të përcaktojë përgjegjësitë konkrete të Vlora Hysenit dhe arsyet që kanë çuar në vendosjen e masës së sigurisë.