Hil Curri: As Puka nuk dëshiron të shkrihet me Fushë-Arrëzin

Kreu i Bashkisë së Fushë-Arrëzit, Hil Curri, thotë se as vetë Bashkia Pukë nuk dëshiron të bashkohet me bashkinë e tij. Ai tha se nuk ishte i ftuar në takimin e zhvilluar të mërkurën nga Kryeministri Rama me kryetarët e bashkisë në Kuç të Vlorës. Curri kujtoi se gjatë një proteste të zhvilluar në Fushë Arrëz kundër këtij projektligji, edhe vetë kryetari i Bashkisë së Pukës, Rrok Dodaj, kishte shprehur mendimin se nuk dëshironte shkrirjen me Fushë Arrëzin.

”Kryetari i Bashkisë Pukë, kryetari i këshillit bashkiak, kryetari i Bashksië së Mirditës erdhi sepse jena zonë kufitare dhe na lidhin traditat. Ai deklaroi publikisht që unë nuk jam dakord të bashkohem me Bashkinë e Fushë Arrëzit. Edhe kryetari i këshillit bashkiak deklaroi që nuk jemi dakord”, tha Curri në ”A2cnn”.

Sipas tij, fatet e një komuniteti nuk mund t’i vendosi një ministër apo një deputet i zonës. ”Ne nuk mund t’i lëmë fatet e të ardhmes të komunitetit të Fushë Arrëzit, që është mbrojtur kur nuk ka pasur shtet, si mund ta pranojmë që me ne mund të luhet. Ne i kemi bërë shërbime qytetarëve me ato mundësi që kemi pasur. Nuk mendoj se kjo është ekspertizë e hartuar me ekserptë të Bashkimit Europian”.