Ish-presidenti Ilir Meta ka reaguar sot teksa është shënuar një vit pas agresionit dhe ndërprerjes së sinjalit të televizionit “News24”, duke e cilësuar ngjarjen si një sulm jo vetëm ndaj një televizioni, por ndaj lirisë së medias dhe fjalës së lirë në Shqipëri.
Sipas ish-presidentit, Shqipëria është zhytur më tej në krizën e lirisë së medias, ndërsa gazetarët që mbajnë qëndrime kritike ndaj qeverisë përballen, sipas tij, me intimidim, kërcënime dhe sulme.
“Shqipëria është zhytur edhe më thellë në krizën e lirisë së medias sipas raporteve të organizatave prestigjioze ndërkombëtare. Gazetarët e pavarur intimidohen, kërcënohen dhe sulmohen, ndërsa çdo zë kritik ndaj regjimit linçohet si armik”, deklaron ai.
Meta e ka drejtuar kritikën e tij ndaj kryeministrit Rama, duke e akuzuar se ka dobësuar llogaridhënien dhe e konsideron median e pavarur si kërcënim për regjimin e tij.
“Edi Rama është shndërruar në simbolin e një diktatori të vendeve të prapambetura afrikane që e urren kritikën, e ka asgjësuar llogaridhënien dhe e konsideron median e pavarur si kërcënim për regjimin e tij”, shkruan Meta.
Në vijim të reagimit të tij, ish-presidenti e ka cilësuar largimin e qeverisë aktuale si një domosdoshmëri për demokracinë.
“Për këtë arsye, largimi i ‘Rilindjes’ dhe i këtij Kryeministri nga pushteti nuk është thjesht një betejë politike. Është një domosdoshmëri për të shpëtuar demokracinë, lirinë e medias dhe për të drejtën e çdo shqiptari për të dëgjuar të vërtetën”, shprehet ai.
Ilir Meta: Sot bëhet një vit nga agresioni i dhunshëm dhe ndërprerja e paligjshme e sinjalit të “News 24”, një akt kriminal që nuk goditi vetëm një televizion, por vetë lirinë e fjalës dhe pavarësinë e medias në Shqipëri.
Një vit më pas, situata është edhe më e rëndë.
Shqipëria është zhytur edhe më thellë në krizën e lirisë së medias sipas raporteve të organizatave prestigjoze ndërkombëtare. Gazetarët e pavarur intimidohen, kërcënohen dhe sulmohen, ndërsa çdo zë kritik ndaj regjimit linçohet si armik.
Një demokraci nuk matet me numrin e televizioneve që transmetojnë, por me lirinë që kanë për të thënë të vërtetën, sidomos atë të vërtetë që pushteti nuk dëshiron ta dëgjojë.
Edi Rama është shndërruar në simbolin e një diktatori të vendeve tê prapambetura afrikane që e urren kritikën, e ka asgjësuar llogaridhënien dhe e konsideron median e pavarur si kërcënim për regjimin e tij.
Por gazetarët nuk mund të jenë shërbëtorë të pushtetit dhe liria e fjalës nuk kërkon leje nga Kryeministri.
As propaganda, as gënjeshtrat e prodhuara nga altoparlantët mediatikë të Qeverisë nuk mund të quhen gazetari.
Gazetaria nuk është propagandë. Gazetaria është e vërteta, pyetja, kritika dhe llogaridhënia.
Prandaj, duhet të jemi të gjithë bashkë në mbrojtje të gazetarëve profesionistë, të medias së pavarur dhe të së drejtës së çdo qytetari për të dëgjuar edhe ato të vërteta që pushteti do t’i fshehë.
Në asnjë rrethanë, jeta, karriera, dinjiteti dhe kushtet e punës së një gazetari nuk mund të varen nga vullneti i një politikani, i një qeverie apo i një oligarku.
Sepse media e lirë nuk mund të ekzistojë nën frikë dhe censurë dhe demokracia nuk mund të mbijetojë pa zëra që guxojnë të thonë troç të vërtetën.
Për këtë arsye, largimi i “Rilindjes” dhe i këtij Kryeministri nga pushteti nuk është thjesht një betejë politike.
Është një domosdoshmëri për të shpëtuar demokracinë, lirinë e medias dhe për të drejtën e çdo shqiptari për të dëgjuar të vërtetën.
Liria e shprehjes është një e drejtë themelore e njeriut dhe një nga shtyllat jetike të një shoqërie moderne e demokratike. Ajo është e pandashme nga llogaridhënia e institucioneve publike dhe nga kontrolli që qytetarët duhet të ushtrojnë mbi pushtetin.
Liria e medias është një nga treguesit më të rëndësishëm të gjendjes së demokracisë. Aty ku gazetarët frikësohen, kërcënohen apo heshtin, ku media kontrollohet nga pushteti dhe llogaridhënia zëvendësohet nga propaganda, aty ekziston diktatura.
Për Shqipërinë, një vend që aspiron të jetë pjesë e Bashkimit Europian, regresi në lirinë dhe pavarësinë e medias është i papranueshëm.
Mirënjohje të gjithë gazetarëve të papërkulur nga dhuna dhe korruptimi i regjimit.
Pa sakrifica nuk ka liri të fjalës!