Integrimi në BE/ Prezantohet programi për përgatitjen e bizneseve, Rama: E ardhmja është e pandalshme!

Kryeministri Edi Rama ka marë pjesë në prezantimin e programit kombëtar për përgatitjen e biznesit për integrimin në Bashkimin Europian, së bashku me komunitetin e biznesit.

Gjatë aktivitetit u prezantuan masat dhe mundësitë që ofron ky program për të ndihmuar sipërmarrjet shqiptare në përgatitjen e tyre për t’u integruar dhe për të konkurruar në Tregun Unik Europian dhe në tregjet e European Union.

“Për t’u gjendur pranë bizneseve në përballjen me të ardhmen, e cila po afrohet me shpejtësi përmes procesit të integrimit në Bashkimin Evropian, kemi ndërmarrë këtë program kombëtar, që do të zbatohet me mbështetjen dhe ekspertizën e UNDP-së. Në kuadër të tij do të angazhohen ekspertë të kualifikuar dhe me përvojë, të cilët do të asistojnë sipërmarrjen shqiptare në përgatitjen për sfidat dhe mundësitë e reja.

Duhet të rrisim mbështetjen për sipërmarrjen, sepse ajo është motori i zhvillimit ekonomik dhe social të vendit. Pa sipërmarrësit nuk mund të ketë zhvillim të qëndrueshëm, por vetëm iluzione dhe pasoja të rënda.

Synimi ynë është që sipërmarrjet e vogla dhe të mesme të kenë mundësinë të zhvillohen më tej. Ato që kanë guximin për të investuar, një vizion të qartë për të ardhmen dhe vullnetin për të ecur përpara, do të gjejnë mbështetjen tonë. Kjo mbështetje do të konkretizohet në ditët në vijim me nisjen e programit “Dyfisho biznesin tënd”, i cili do të mbështesë sipërmarrjet që synojnë të rriten dhe të arrijnë një nivel më të lartë zhvillimi”, tha Rama.