Kryeministri Edi Rama, përmes një publikimi në rrjetet sociale, ka sjellë në vëmendje një histori suksesi që mishëron kthimin te rrënjët, fuqinë e sipërmarrjes dhe potencialin e zhvillimit të turizmit rural në Shqipëri. Në qendër të këtij rrëfimi është agroturizmi “N’Kanu”, në fshatin Perlat të Mirditës, një shembull se si vizioni, përkushtimi dhe mbështetja institucionale mund të shndërrojnë një iniciativë familjare në një destinacion të mirëfilltë mikpritjeje.
“Pas viteve të emigrimit, Ermal Dukaj vendosi të kthehej në vendlindje për të investuar në tokën dhe trashëgiminë familjare, duke i dhënë një dimension të ri një bujtine e cila i ka fillesat që në vitin 1997. Me mbështetjen e Programit IPARD II, ai zgjeroi kapacitetet akomoduese dhe e shndërroi “N’Kanu” në një destinacion mikpritës për vizitorët vendas dhe të huaj”, shkruan Kryeministri në postimin e tij.
Duke vijuar, Rama vë në pah një nga tiparet më domethënëse të kësaj sipërmarrjeje, modelin e saj të qëndrueshëm dhe lidhjen organike me prodhimin vendas: “Një element i veçantë i kësaj sipërmarrjeje është se rreth 80% e prodhimit dhe furnizimit me ushqime sigurohet nga vetë ferma, duke garantuar produkte të freskëta, autentike dhe një lidhje të drejtpërdrejtë mes prodhimit vendas dhe tryezës.”
Ky model nuk përfaqëson vetëm suksesin e një biznesi familjar, por edhe filozofinë e agroturizmit modern, ku mikpritja, natyra, tradita dhe prodhimi bujqësor bashkohen në një përvojë autentike për çdo vizitor. Ai dëshmon se investimi në vendlindje nuk është vetëm një zgjedhje ekonomike, por edhe një akt besimi ndaj potencialit të komunitetit, trashëgimisë dhe burimeve që ofron territori.
Postimi shoqërohet me një fotogaleri që pasqyron etapat e realizimit të këtij projekti, transformimin e bujtinës ndër vite dhe frytet e një pune të palodhur. Përmes këtyre imazheve rrëfehet jo vetëm historia e ngritjes së agroturizmit “N’Kanu”, por edhe rrugëtimi i një sipërmarrjeje që lindi nga dëshira për t’u rikthyer në vendlindje dhe u shndërrua në një model zhvillimi për zonën.
Ky investim është një dëshmi konkrete se programet mbështetëse, si IPARD II, mund të krijojnë mundësi reale për zhvillimin e ekonomisë rurale, nxitjen e punësimit dhe promovimin e turizmit të qëndrueshëm. Ai përfaqëson një shembull se si një ëndërr personale mund të kthehet në një vepër me vlerë për komunitetin, duke pasuruar ofertën turistike të Mirditës dhe duke dëshmuar se e ardhmja e fshatit shqiptar ndërtohet mbi harmoninë mes traditës, sipërmarrjes dhe vizionit për zhvillim.
Albert Vataj