Ish-Parku Aulona në Vlorë drejt shpronësimit, Rama inspekton zonën

Kryeministri Edi Rama ka zhvilluar këtë pasdite të së hënës një vizitë në Vlorë, ku është ndalur edhe në zonën e ish-parkut Aulona. Gjatë vizitës, Rama është shoqëruar nga kryetarja e Bashkisë së Vlorës, Brunilda Mersini.

Në fokus të vizitës ka qenë një pronë private në të cilën prej vitesh funksionon një park lojërash për fëmijë. Prona, e cila prej kohësh është përfshirë në një konflikt pronësie, pritet t’i nënshtrohet procedurave të shpronësimit.

Hapësira e ish-parkut Aulona synohet të transformohet në një lulishte dhe zonë të gjelbër, duke i shtuar qytetit një tjetër hapësirë publike.

Ndërhyrja parashikon ndryshimin e funksionit aktual të territorit, nga një park privat lojërash në një hapësirë të gjelbër në shërbim të qytetarëve dhe vizitorëve të Vlorës.