“Jo zëvendësime”, Sali Berisha kërkon Ramën në çdo interpelancë

PD nuk pranon që interpelancat me Kryeministrit të zhvillohen nga ndonjë ministër i deleguar prej tij. Sali Berisha gjatë një mbledhje me deputetët, vendosi këtë kusht për miratimin e rregullores së re të Kuvendit e cila prej ditësh po negociohet mes palëve për të shkuar drejt një drafti të përbashkët.

“Në qoftë se neni 80 i Kushtetutës përcakton se kryeministri dhe ministrat janë të detyruar të paraqiten në interpelancë kur kërkohet nga deputetët, asnjë deputet nuk do të pranojë delegimin e interpelancës nga kryeministri”, tha Berisha.

Nga ana tjetër, Berisha përgëzoi punën e bërë deri më tani nga komisioni i posaçëm dhe premtoi se shumë shpejt do të publikojnë hartën se si partia Demokratike e do ndarjen territoriale të vendit.

“Ne jemi të vendosur të paraqesim, në përputhje me interesat e tyre, hartën më të mirë, ndarjen territoriale më në interes të qytetarëve. Dhe këtë na e bën të mundur plotësisht ekspertiza e jashtëzakonshme që ka Kongresi i Autoriteteve Lokale dhe Rajonale pranë Këshillit të Evropës, praktika shumë e pasur e vendeve evropiane, të cilat kanë komuna nga 80 banorë në 1 milion banorë”, u shpreh Berisha.