Jorida Tabaku: Integrimi në BE është i vetmi mekanizëm për të frenuar arrogancën e mazhorancës

Deputetja e PD-së, Jorida Tabaku thotë se procesi i integrimit europian mbetet mekanizmi për të ushtruar presion ndaj mazhorancës dhe për të frenuar përqendrimin e pushtetit. Sipas saj me avancimin e negociatave Shqipëria do të jetë nën një monitorim më të fortë nga institucionet europiane dhe nuk do të mund të miratojë ligje që bien ndesh me standardet e BE-së.

”Ligji i investimeve strategjike, ligji i shoqërive aksionare apo ai për zonat e mbrojtura nuk janë as në frymë dhe as në gërmë të legjislacionit të Bashkimit Europian. Tani çdo gjë do të ketë një analizë tjetër”, u shpreh në ”A2cnn”.

Deputetja demokrate theksoi se procesi i integrimit është rruga e vetme për të ulur arrogancën e qeverisë dhe për të garantuar më shumë kontroll institucional. ”Shoh procesin e integrimit si të vetmin presion ku mund të ushtrojmë presion mbi mazhorancën dhe të ulim përqendrimin e pushtetit. Nuk ka mënyrë tjetër”, deklaroi Tabaku.

Ajo komentoi bashkëpunimin mes Partisë Demokratike dhe Partisë Socialiste për miratimin e rezolutës për integrimin dhe ndryshimet në rregullore, duke thënë se PD dha dakordësinë për shkak të rëndësisë së procesit të integrimit dhe miratimit të IBAR.