Jorida Tabaku në Berlin: Integrimi nuk bëhet me propagandë, por me institucione të forta dhe vullnet politik

Opozita ka zhvilluar një tur takimesh në Gjermani, me fokus procesin e integrimit të Shqipërisë në Bashkimin Europian. Deputetja e PD-së, Jorida Tabaku përmes një videomesazhi, shprehet se integrimi nuk mund të mbetet vetëm në nivel deklaratash apo hapjesh formale kapitujsh, por kërkon reforma reale dhe institucione të forta.

Sipas saj, tërheqja e investimeve të huaja lidhet drejtpërdrejt me garantimin e konkurrencës së ndershme dhe forcimin e shtetit ligjor. ”Rruga e integrimit kalon përmes institucioneve të forta. Tërheqja e investimeve të huaja kërkon institucione të forta dhe reforma ekonomike që sot, fatkeqësisht, nuk janë kryer”, shprehet Tabaku në mesazhin e saj.

Nga ana tjetër, pjesëmarrja e përbashkët e përfaqësuesve të opozitës dhe qeverisë në këtë vizitë është paraqitur si një sinjal bashkëpunimi institucional në një proces që konsiderohet kombëtar. Takimet janë zhvilluar me përfaqësues të institucioneve gjermane, përfshirë Kancelarinë Federale dhe Bundestagun, ku është diskutuar mbi ecurinë e vendeve kandidate dhe perspektivën e Shqipërisë në procesin e zgjerimit të BE-së.

Vizita është organizuar me ftesë të ministrit gjerman për Çështjet Europiane Gunther Krichbaum dhe ka në fokus shkëmbimin e përvojave mbi reformat dhe standardet që kërkon integrimi europian.