Jorida Tabaku: Në Strasburg po përcjellim zërin e qytetarëve që duan një Shqipëri europiane jo vetëm në retorikë

Deputetja e PD-së, Jorida Tabaku së bashku me kolegët Gazment Bardhin dhe Agron Gjekmarkaj, kanë zhvilluar në Strasburg një takim me eurodeputetin dhe raportuesin e Parlamentit Europian për Shqipërinë, David McAllister, ku u diskutua procesi i integrimit europian të vendit.

Tabaku vlerësoi McAllister si “mik të Shqipërisë” dhe një zë të rëndësishëm e të qëndrueshëm në mbështetje të anëtarësimit të vendit në Bashkimin Europian. Ajo e falënderoi për angazhimin e tij të vazhdueshëm, për misionin faktmbledhës në Tiranë, si dhe për qasjen e tij ndaj zhvillimeve në Shqipëri.

Sipas saj, raportet e Parlamentit Europian pasqyrojnë një qëndrim të qartë: mbështetje për anëtarësimin e Shqipërisë në BE, por edhe evidentimin e sfidave që vendi duhet të adresojë në rrugën e integrimit.

Postimi i plotë

Gjithmonë kënaqësi të takohem me mikun e Shqipërisë, David McAllister , një zë i rëndësishëm dhe i qëndrueshëm në mbështetje të integrimit europian të vendit tonë.

E falënderova për angazhimin e tij të vazhdueshëm ndaj Shqipërisë, për misionin faktmbledhës në Tiranë dhe për qasjen e sinqertë që reflektohet edhe në raportin e Parlamentit Europian: mbështetje të plotë për anëtarësimin e Shqipërisë në BE, por edhe një pasqyrim të qartë të sfidave që ende duhet të kapërcejmë.

Në Strasburg po përcjellim zërin e shqiptarëve që duan një Shqipëri europiane jo vetëm në retorikë, por në standarde, institucione dhe mundësi. Sepse rruga drejt Bashkimit Europian kalon përmes reformave reale, sundimit të ligjit dhe një shteti që punon për qytetarët e tij.