Jorida Tabaku: Qeveria po zëvendëson subvencionet me kredi, ndërsa bujqësia dhe fasoneria janë në krizë

Deputetja e PD-së, Jorida Tabaku thotë se qeveria po ndjek politika të gabuara ndaj sektorëve të bujqësisë dhe prodhimit fason, duke zëvendësuar subvencionet me skema kredie që, sipas saj, nuk i japin zgjidhje problemeve të këtyre sektorëve. Gjatë fjalës së saj në seancën parlamentare, Tabaku tha se bujqësia vazhdon të vuajë pas pezullimit të fondeve të programit IPARD, ndërsa fermerëve po u ofrohen kredi në vend të granteve. Sipas saj, qeveria nuk ka politika efektive subvencionimi për fermerët, në një kohë kur sektori i bujqësisë është në rënie dhe zonat rurale po përballen me braktisje të vazhdueshme.

Tabaku kritikoi gjithashtu skemën e re të financimit për bizneset prodhuese dhe industrinë fason, e cila parashikon kredi me interesa të ulëta dhe fonde garancie. Ajo argumentoi se bizneset kanë nevojë për mbështetje të drejtpërdrejtë dhe subvencione, pasi po përballen me vështirësi të shumta, përfshirë efektet e kursit të këmbimit të euros dhe rritjen e kostove të aktivitetit.

Tabaku tha se shumë ndërmarrje prodhuese dhe fasoneri po reduktojnë aktivitetin ose po mbyllin operacionet, ndërsa kreditë, sipas saj, nuk adresojnë nevojat e menjëhershme të këtyre bizneseve për kapital qarkullues dhe mbështetje financiare. Ajo theksoi se bujqësia ka humbur peshë në ekonominë shqiptare dhe se prodhimi vendas po dobësohet, ndërsa ekonomia po mbështetet gjithnjë e më shumë te sektori i ndërtimit.

Sipas Tabakut, modeli aktual ekonomik po favorizon sektorë me ndikim afatshkurtër në rritjen ekonomike, ndërsa prodhimi dhe eksportet po humbasin konkurrueshmërinë. Ajo kërkoi politika që nxisin prodhimin, investimet në teknologji dhe përfundimin e ciklit të vlerës së shtuar në vend. Tabaku deklaroi se bizneset e kanë të vështirë të operojnë në një klimë që, sipas saj, karakterizohet nga mungesa e konkurrencës së ndershme dhe përqendrimi i përfitimeve ekonomike në pak duar.