Seanca plenare në Kuvend këtë mbrëmje u përfshi nga tensione të forta mes mazhorancës dhe opozitës, pas përjashtimit të deputetit të PD-së, Luçiano Boçi. Sekretari i Përgjithshëm i Partisë së Lirisë, Tedi Blushi e ka cilësuar vendimit si anti-kushtetues. Një reagim erdhi edhe nga deputeti i Partisë Mundësia, Erald Kapri, i cili tha se përjashtimet e deputetëve të opozitës janë si ”kamxhik” ndaj vetë opozitës.
“Përjashtimet si kamxhik ndaj opozitës, nuk janë normale në një Parlament. Situata që sapo ndodhi qëpar, ishte një kërkesë për të marrë fjalën në Parlament. Mund të kërkonit pak qetësi, por përjashtimin e deputetëve nuk mund ta bëni. Përjashtimi tregon dobësinë tuaj. E keni përdorur shpesh edhe ndaj forcës tonë politike, ku kryetarin e keni përjashtuar 20 ditë, ditën që u votëbesua qeveria”, tha mes të tjerash Kapri.
Kryeparlamentari Peleshi iu përgjigj Kaprit duke i thënë se ai nuk ishte në sallën e Parlamentit kur u mor vendimit dhe sipas tij, nuk kishte nga ta dinte që përjashtimi i Boçit ishte i pabazuar në rregullore.