Komisioni Europian vlerëson se sistemi gjyqësor në Shqipëri ka ruajtur stabilitetin pas zbatimit të Reformës në Drejtësi, por thekson se gjatë periudhës së fundit kanë vijuar përpjekjet për ndikim të padrejtë mbi institucionet e drejtësisë. Në raportin vjetor për shtetin e së drejtës evidentohet se magjistratët kanë qenë objekt i sulmeve personale dhe presioneve publike. Sipas dokumentit, tetë magjistratë, mes tyre dy gjyqtarë dhe gjashtë prokurorë, janë vendosur nën mbrojtje, përfshirë prokurorë të SPAK-ut dhe ish-kryetarin e Këshillit të Lartë të Prokurorisë.
Raporti nënvizon se përfaqësues të lartë të politikës dhe institucioneve shtetërore kanë tentuar të ushtrojnë ndikim mbi drejtësinë përmes deklaratave publike. Sipas KE-së, pezullimi nga detyra i një zyrtari të lartë me vendim të Gjykatës së SPAK-ut, si edhe kërkesa e SPAK-ut drejtuar Kuvendit për heqjen e imunitetit të tij, u shoqëruan me reagime të forta nga pushteti ekzekutiv dhe ai legjislativ, përfshirë kritika dhe sulme të drejtpërdrejta ndaj SPAK-ut dhe institucioneve gjyqësore. Në përgjigje të këtyre zhvillimeve, organet drejtuese të sistemit gjyqësor reaguan publikisht duke dënuar presionin politik.
Dokumenti evidenton gjithashtu mangësi në aksesin e qytetarëve në drejtësi, duke përmendur nevojën për përmirësimin e ndihmës ligjore, infrastrukturës dhe sigurisë në gjykata. Në fushën e luftës kundër korrupsionit, Komisioni Europian vlerëson se kuadri institucional është forcuar, por bashkëpunimi ndërmjet institucioneve mbetet i pamjaftueshëm. Raporti thekson se korrupsioni vazhdon të paraqesë rrezik të lartë, veçanërisht në Policinë e Shtetit, prokurimet publike dhe sektorët me ekspozim të lartë ndaj abuzimeve. Sa i përket procesit të rivlerësimit kalimtar, raporti evidenton se deri tani janë shkarkuar 456 gjyqtarë dhe prokurorë, ndërsa 348 të tjerë janë konfirmuar në detyrë, duke përbërë 43 për qind të rasteve të shqyrtuara.
