Këshillat Bashkiakë të Këlcyrës dhe Klosit votojnë kundër shkrirjes së bashkive

Drafti i Partisë Socialiste për reformën e re territoriale ka nisur të përballet me rezistencë në disa bashki të vendit, ndërsa këshillat bashkiakë po shprehin zyrtarisht kundërshtimin ndaj propozimeve për shkrirjen e njësive vendore. Bashkia e Këlcyrës është e para që ka marrë një vendim të qartë kundër planit për bashkimin me Bashkinë e Përmetit. Në një mbledhje të jashtëzakonshme, të gjithë 15 anëtarët e Këshillit Bashkiak votuan unanimisht kundër draftit të propozuar nga mazhoranca socialiste.

Vendimi pasoi reagimet dhe protestat e banorëve, të cilët kanë kërkuar që Këlcyra të ruajë statusin e saj si bashki dhe të mos përfshihet në një bashkim administrativ me Përmetin. Këshilltarët vendorë, pavarësisht përkatësisë politike, i bënë gjithashtu thirrje Këshillit Bashkiak të Përmetit të mos mbështesë këtë propozim.

Debati për reformën territoriale ka nisur edhe në Bashkinë e Klosit, e cila sipas draftit parashikohet të bashkohet me Bashkinë Mat. Kryetarja e Bashkisë Klos, Valbona Kola, bëri të ditur se përpara çdo vendimi do të zhvillohen dëgjesa publike në të gjitha njësitë administrative për të marrë mendimin e banorëve. Sipas saj, qëndrimi përfundimtar do të reflektojë vullnetin e qytetarëve. “Nëse qytetarët do të jenë pro, do të jem pro. Nëse qytetarët do të jenë kundër, edhe unë do të jem kundër,” deklaroi Kola.

Drafti i PS-së parashikon shkrirjen e 15 bashkive në rang vendi. Sipas projektit, 33 bashki do të mbeten të pandryshuara, ndërsa 28 do pësojnë ndryshime administrative. Reforma nuk prek ndarjen në qarqe, por parashikon krijimin e një niveli të ri të qeverisjes vendore për qytetet me status të veçantë ligjor, të cilat do të kenë edhe një nënkryetar të dedikuar për koordinimin administrativ.