Kina ndërton Rrugën e Arbrit, firmoset marrëveshja në Beograd, Rama: Punimet, vitin tjetër

Rikthehet miqësia, Shqipëri-Kinë. Qeveria Kineze do të ndërtojë Rrugën e Arbrit në Shqipëri, por jo vetëm kaq, pasi priten investime të tjera në sektorë strategjikë . Ministri Haxhinasto firmosi marrëveshjen me palën kineze, në prani të Kryeministrit Edi Rama. Lajmin e publikoi sot Kryeministri Edi  Rama nga Beogradi, i cili po merr pjesë në Samitin e udhëhequr nga Kina, me vendet e rajonit. Rama shkruan në profilin e tij Facebook, i kënaqur me marrëveshjen e arritur, në një kohë kur qeveria e kryesuar prej tij po has vështirësi në investime, për shkak të mungesës së fondeve: – “U nënshkrua mbrëmë memorandumi i bashkëpunimit me Chinese Exim Bank, për hapjen e një kantieri projektesh në Shqipëri me financime kineze. Projekti i parë që do të çelë siparin e një epoke të re bashkëpunimi mes Shqipërisë e Kinës do të jetë Rruga e Arbërit, e cila do të nisë vitin e ardhshëm.” Shqipëria pati marrëdhënie të shkëlqyera me Kinën në vitet ’70, në kohën e regjimit komunist. Por në fillim të viteve ’80  këto marrëdhënie “ngrinë” për t’u rikthyer sot, ndoshta edhe më premtuese se më parë.