“KOHA JONE” shpall tre Njerëzit e Vitit 2014: Edi Rama, Ilva Tare dhe Samir Mane

Fituesit e sondazhit të vitit në “Koha Jonë”

Ashtu siç është bërë traditë nga gazeta “Koha Jonë”, çdo fundviti, lexuesit e saj kanë mundësinë të zgjedhin personazhet më me ndikim në jetën publike në vend. Sondazhi on-line  i hapur ditët e para të muajit dhjetor ka qenë një dritare ku lexuesit kanë shprehur me votë simpatitë e tyre për personalitete nga fushat e politikës, medias dhe biznesit. Sondazhi është realizuar me korrektësi maksimale dhe çdo lexues ka pasur mundësi të shprehet me votë vetëm një herë. Votuesit online kanë përzgjedhur kryeministrin Edi Rama si politikanin e vitit, Samir Manen si biznesmenin e vitit dhe Ilva Taren si gazetaren e vitit.

Rama, politikani i vitit

Viti 2014 nuk pati humbës dhe fitues nga pikëpamja elektorale, por ngjarjet politike e kanë dominuar vendin gjatë gjithë kohës. Ka pasur reforma, beteja të ashpra politike dhe nisma që kanë pasur gjithmonë në qendër të tyre një emër politikani. Me apo pa dashje, kryeministri Edi Rama ka qenë në qendrën e zhvillimeve më të rëndësishme politike. Protagonizmi ka ardhur jo vetëm për shkak të karizmës dhe aftësive të tij polemizuese, por edhe për shkak të vendimmarrjes si kryesues i mazhorancës. Lexuesit online të gazetës “Koha Jonë” kanë zgjedhur që ta votojnë si politikanin e vitit, me një diferencë dukshme më të madhe sesa gjithë politikanët e tjerë. Një diferencë që justifikohet edhe me faktin se Rama ka zgjedhur të jetë jo një kryeministër që merr vetëm vendimet, por edhe një drejtues që preferon të përballet edhe me ata që mendojnë të kundërtën e nismave të tij. Ndaj në këtë vit, Rama ka lënë gjurmët e tij politikë. Rama mbetet përherë sfidues, kërkues, por edhe fshikullues.

Në qershor të këtij viti, Shqipëria mori statusin e vendit kandidat për në Bashkimin Europian. Sigurisht nuk është një meritë vetëm e mazhorancës së majtë, pasi integrimi është një proces i gjithë qeverive të mëparshme. Megjithatë, pas tre refuzimesh nga Brukseli puna e bërë nga kabineti “Rama” duket se ishte një sinjal i qartë për vendet e BE-së për të hapur dritën jeshile për Shqipërinë.

Një nga operacionet më të suksesshme të qeverisë së drejtuar nga kryeministri Edi Rama është padyshim aksioni antikanabis në Lazarat. Pas 23 vitesh, shteti vendosi autoritetin e tij në komunën rebele që ishte bërë njolla e zezë e Shqipërisë për trafikun e lëndëve narkotike dhe simbolizonte dështimin e shtetit. Ishte një operacion i drejtuar nga ministri i Brendshëm, Saimir Tahiri dhe zyrtarë të tjerë të lartë të rendit, por të gjithë jemi të vetëdijshëm se pa një vendosmëri të kreut të qeverisë, vështirë se do të ishte bërë i mundur shkatërrimi i një prej plantacioneve më të mëdha të kanabisit në rajon. Edi Rama ishte urdhëruesi e zbatuesi, në të vertetë.

Prishja e ndërtimeve pa leje është një tjetër aksion që rriti kuotat e kryeministrit Edi Rama. Një operacion i munguar prej vitesh dhe më i ashpër sesa ai i heqjes së kioskave në lumin e Lanës, duket se pritej prej kohësh nga qytetarët. Ndaj Rama në këtë pikë nuk zhgënjeu. Viti 2014 do të mbahet mend si koha kur mori fund masakra urbane dhe ndërtimet pa kriter. Sigurisht, metodat e përdorura, tritoli dhe shembjet masive kanë pasur kritika. Por efekti pozitiv është më i madh dhe janë më të shumtë ata që vlerësojnë Ramën për këtë aksion, sesa ata që e kritikojnë.

Në këtë linjë, është dhe aksioni për energjinë. Është një operacion më i gjatë në kohë dhe më i dhimbshëm, por të gjithë mendojnë se është i domosdoshëm. Prej muajsh, energjia nuk shihet më si një element ku shteti mund të vidhet, ku një pjesë e njerëzve paguajnë faturat dhe të tjerët vjedhin prej 24 vjetësh. Është një rrugë që e ka nisur me forcën e ligjit, por mbetet të shikohet në 2015-ën se sa do të jetë vazhdues i kësaj reforme epokale që t’i ngulitet çdo njeriu, me hall e pa halle se “energjia është si çdo mall tjetër që shitet e blihet”.

Aksionet si energjia, ndërtimet pa leje, Lazarati, etj, kanë të përbashkët qëndrimin për respektimin e ligjit. Jo detyrimisht lidhen me emrin e kryeministrit, pasi janë institucione të tëra që kanë qenë në veprim. Por institucionet kanë qenë dhe më parë, fondet e shtetit dhe baza ligjore nuk ka munguar për të marrë masa. Ajo që ka munguar ka qenë një qëndrim i prerë politik dhe marrja përsipër e kostove elektorale. E në këtë rast, merita është e Kryeministrit. Edhe kostot, nëse do ketë, janë të Edi Ramës.

Ndërsa beteja për vendosjen e ligjit është pika ku Rama ka marrë vlerësime maksimale, protagonizimi i tij nuk ka munguar dhe në politikën e jashtme. Janë disa ngjarje që kanë rritur kuotat e tij si politikan në politikën rajonale. E para, është takimi i vendeve të rajonit në Samitin e Ballkanit të organizuar nga Kancelaria gjermane Angela Merkel. Rama arriti të dalë nga qerthulli i një lideri me komplekse lokale, siç kanë qenë shpesh kryeministrat e mëparshëm dhe dëshmoi edhe lidership rajonal. Jo rastësisht ishte një nga zërat kryesorë të këtij forumi që u mbajt në muajin gusht. Në këtë rast, rritja e kuotave nuk lidhet thjesht me emrin e Ramës si politikan, por edhe me prezantimin e Shqipërisë në një mënyrë më dinjitoze.

Ngjarja kryesore ku Rama është vlerësuar edhe nga kritikët më të rreptë të tij është vizita në Serbi. Ishte një vizitë me karakter historik, jo vetëm sepse një kryeministër shqiptar shkonte në Beograd pas 68 vjetësh, por edhe për qëndrimet e mbajtura. Për herë të parë, një kryeministër foli në Beograd përballë homologut të tij lidhur me pavarësinë e Kosovës. Qëndrimi i mbajtur nga Rama ishte jo vetëm tregues lidershipi, por edhe prezantim dinjitoz i politikës së jashtme të Shqipërisë.

Ky është Edi Rama për vitin 2014. Vitin 2015 nuk e ka të lehtë se ka zgjedhjet vendore dhe protestat e opozitës, ku gjasat duken se do të jenë radikale.

***

Ilva Tare

Padyshim Ilva Tare është një personazh i rëndësishëm i botës së medias. Roli dhe veprimtaria e saj në fushën e gazetarisë dhe jo vetëm, është shembulli më sinjifikativ i triumfit të femrës shqiptare, i treguesit të vlerave intelektuale që mishëron në një shoqëri aspiratash integruese

Jetshkrimi

– Master shkencor në media dhe komunikim në London School of Economics, 2007- 2008

– Përditësim i teorive të ndryshme, koncepteve dhe zhvillimeve shkencore në fushën e kërkimit të medias dhe komunikimit. Mbrojtja e temës së Masterit për televizionet private, pas viteve ‘2000 në Shqipërinë post komuniste, e vlerësuar me Distinction.

– Studimet e larta për Gazetari në Universitetin e Tiranës,              1994-1998.

– Lëndët e studiuara përfshijnë etikën, kritikën analitike të shtypit, shkrimi, raportimi, menaxhimi dhe praktika në televizion.        

Eksperienca profesionale

– Drejtore e Departamentit të Informacionit në RTV “Ora News”           2014, në vazhdim.

– Organizon dhe drejton redaksinë e lajmeve për ndjekjen e ngjarjeve të ditës

– Koordinon thellimin dhe qëndrimin editorial të lajmeve për ngjarje me interes të veçantë për publikun.

– Drejtore dhe prezantuese e “Tonight Ilva Tare” në “Ora News”             2011, në vazhdim.

– Producente e një programi politik dhe të aktualitetit, me thellim në analizë dhe ekspertizë.

– Intervista ekskluzive me personalitete shqiptare dhe ndërkombëtare.

– Gazetare për Mergermarket (pjesë e ‘Financial Times’ group)            2009-2010.

•  Artikuj dhe intervista hulumtuese për aktivitete të shitjeve dhe blerjeve të kompanive në Ballkan.

•  Përgjegjëse për Shqipërinë, Kosovën, Maqedoninë dhe Malin e Zi.

– Drejtore dhe Producente e Programit “ORA 7” në TV Klan               2005-2007.

•  Konceptim dhe realizim i programit të parë televiziv në Shqipëri me lajme dhe ngjarjet e fundit.

•  Realizim i sondazheve të përditshme TV me teleshikuesit për çështje kyçe.

– Trajnere e Medias për OSBE, Shqipëri, Prill-Maj 2005

•  Trajnim me TV lokale të punonjësve dhe gazetarëve në disa qytete.

•  Përpilim i një raporti me përfundime për OSBE mbi gjendjen e TV lokale në Shqipëri.

–  Drejtore e Lajmeve dhe Prezantuese e lajmeve të mbrëmjes “Vizion Plus”, 2002-2005            

 •  Μenaxhim dhe drejtim i programeve të informacionit të televizionit.

•  Përgjegjësi për zgjedhjen, përpunimin dhe prezantimin e ngjarjeve kryesore të ditës dhe mbikëqyrje e linjës editoriale të lajmeve.

– Kryeredaktore e Lajmeve “Telenorba Shqiptare”,                     1998-2002

•  Drejtuese e departamentit të lajmeve

•  Prezantuese e edicionit kryesor të lajmeve

– Gazetare në TVSH, 1994-1997.

•  Bashkëpunëtore në departamentin e lajmeve të Televizionit Publik Shqiptar.

•  Prezantuese e lajmeve të edicioneve të ditës.     

– Eksperiencë Prodhimi Dokumentarësh

•  Bullets and Bucks: Al Jazeera English, Gjuha Angleze – 2010

•  Producente e një dokumentari 21 minutësh për Al Jazeera English për shpërthimin e Gërdecit ku u vranë 26 vetë dhe u plagosën dhjetëra të tjerë. Skandali përfshin tregti ndërkombëtare armësh, korrupsion dhe vrasje.

– Media: Mision apo Biznes? Gjuha Shqipe – 2002

•  Producente e një dokumentari 60-minutësh, realizuar në SHBA për çështjet e lirisë dhe medias në Amerikë. U zhvilluan me shumë se 30 intervista me gazetarë dhe ekspertë të medias në Washington DC, New York, i sposorizuar nga Departamenti Amerikan i Shtetit.

Gjuhët e huaja

•  Shkrim dhe komunikim i shkëlqyer në Anglisht, Frëngjisht dhe Italisht. Nivel i ndërmjetëm në Spanjisht.

Vlerësimi i lexuesve, një përgjegjësi e shtuar

Nga Ilva Tare

Vlerësimin e lexuesve të gazetës ikonike të shtypit shqiptar "Koha Jonë" e çmoj si një përgjegjësi të shtuar dhe angazhim për më shumë punë në shërbim të informimit të publikut. Faleminderit lexuesve, por edhe botuesit Nikoll Lesi për zhurmën që krijon mendja e tij!

Viti 2014 nuk ka qenë i lehtë për qytetarët shqiptarë dhe as për median. Sfida të shumta që presin zgjidhje dhe dilema që duan përgjigje përmes raportimeve sa më profesionale dhe të besueshme të gazetarëve. Kjo është një përpjekje që më mundon çdo ditë në punën time. Shpresoj që publiku të mirëkuptojë edhe vështirësitë e gazetarëve, të cilët nuk janë imunë ndaj problemeve që kalon vendi.

Faleminderit edhe Presidentit të RTV Ora News, z. Ylli Ndroqi, që më ka besuar dhe mbështetur në përpjekjet e mia për të bërë gazetari sa më afër standardeve profesionale edhe në kushtet kur studiot televizive ndikohen nga zëdhënia politike dhe interesat e tyre. Nuk është e lehtë dhe e parashikoj edhe më të vështirë përgjatë vitit elektoral 2015.

Misioni i gazetarëve për të dëshmuar faktet që shërbejnë për të shkruar një draft të parë të ngjarjeve, është i sfiduar nga rrethana dhe grupe interesash më të fuqishme se e vërteta dhe e drejta. Deri më sot askush nuk mund të thotë që ka fituar mbi të vërtetën dhe të ketë monopolin e zotërimit të saj. Koha është matësi më i përafërt i së vërtetës. Prej dy dekadash unë i kam besuar vetes dhe punës sime dhe jam ndjerë e vlerësuar nga publiku dhe mesazhet inkurajuese. Kurajo dhe përulje ndaj interesave të publikut i uroj edhe kolegëve të mi të medias shqiptare për 2015-tën!

***

Samir Mane:

“Një çmim që më bën të ndihem akoma më shumë i privilegjuar”

Biznesmeni Samir Mane u zgjodh nga lexuesit e “Koha Jonë” si “Biznesmeni i Vitit”. Në një prononcim për gazetën, ai shprehet se çmimi është një vlerësim i veçantë që i bëhet punës së tij. “Për këdo është një kënaqësi që të marrë vlerësime për punën e bërë dhe për atë që falë punës ka arritur. E njëjta gjë vlen edhe për mua. Ndihem i lumtur që “Koha Jonë” më ka veçuar mua ndër shumë biznesmenë të tjerë shqiptarë. Ky çmim vlen akoma më shumë kur të bëhet nga një media që shquhet për qëndrimet kritike karshi të gjithëve. Kjo e bën akoma më të veçantë këtë si organizim dhe më bën të ndihem akoma më shumë i privilegjuar. Falënderoj lexuesit që kanë bërë vlerësimet në gazetën “Koha Jonë” për këtë çmim”, – u shpreh dje biznesmeni i njohur Samir Mane.

Samir Mane

President i Grupit BALFIN

Z. Samir Mane është President i Grupit BALFIN. Balkan Finance Investment Group është ndër grupet më të mëdha në Shqipëri dhe rajonin e Ballkanit. Portofoli i investimeve të Grupit përfshin aktivitete në fushën e pasurive të paluajtshme, shitjeve me pakicë, manaxhimin e ambienteve industriale dhe tregtare, minierave dhe metalurgjisë, telekomunikimeve, etj. Aktualisht pjesë e Grupit BALFIN janë mbi 18 kompani dhe është i pranishëm në 7 shtete të ndryshme duke punësuar rreth 3000 persona. I lindur në Korçë në vitin 1967, pasi mbaroi studimet në gjimnazin e qytetit vazhdoi studimet në Universitetin e Tiranës në Fakultetin e Gjeologji-Minierave.

Pas rënies së komunizmi, ashtu si shumë studentë të tjerë, z. Samir Mane emigroi jashtë vendit duke shkuar në Austri, Vjenë. Aty njohja e disa gjuhëve të huaja i krijoi përparësi të mëdha dhe e ndihmoi që të punësohej si përkthyes. Kjo punë i krijoi mundësi shumë të mira për të njohur e për t’u prezantuar me njerëz të fushës së biznesit dhe për të parë nga afër si operonin shumë biznese në perëndim. Gjatë këtyre takimeve dhe njohjeve u zhvillua edhe ideja shoqëruar me ambicien për të krijuar në Shqipëri një rrjet dyqanesh që do të sillnin për shqiptarët teknologjinë më të fundit.

Që nga viti 1993, pas themelimit të shoqërisë Alba Trade, ai u kthye në Shqipëri për të realizuar ëndrrën e tij. Kështu, dyqani i parë i Neptun u hap në Tiranë në vitin 1993. Në një periudhë shumë të shkurtër kohore rrjeti i Neptun u zgjerua edhe në qytetet e tjera kryesore të Shqipërisë. Ndërsa gjatë viteve të fundit Neptun është shndërruar në një emër të rëndësishëm të shitjeve me pakicë të pajisjeve elektronike edhe në Maqedoni, Mal të Zi, Kosovë dhe Serbi, duke e kaluar biznesin në nivel rajonal.

Në vitin 2002, z. Mane vendosi që ishte momenti i duhur për ta diversifikuar biznesin e aktiviteteve të tij edhe në industrinë e ndërtimit. Shoqëria e krijuar prej tij, Mane TCI, prezantoi standarde të reja në ndërtim përsa i përket cilësisë si në ndërtimet civile ashtu edhe në ato industriale. Sot kompania e krijuar nga z. Mane është një ndër më të mëdhatë në vend duke realizuar projekte si komplekse rezidenciale vilash, apartamentesh, resorte turistike, ndërtesa industriale, godina tregtare, etj..

Z. Samir Mane ishte përsëri i pari që pa një mundësi për të transformuar mënyrën e blerjeve në Shqipëri duke hapur qendrën e parë tregtare në vend. Në vitin 2005 u përurua QTU, Qendra Tregtare Univers. Edhe sot e kësaj dite QTU përfaqëson qendrën tregtare më popullore në Shqipëri me numrin më të madh të vizitorëve. Pas suksesit të qendrës së parë tregtare, z. Mane vendosi që tregu ishte i gatshëm për një qendër të dytë tregtare. Në vitin 2011 u përurua qendra e dytë tregtare Tirana East Gate, e ndjekur nga një qendër tjetër por kësaj here në Maqedoni, Skopje City Mall.

Kategoria e shitjeve me pakicë u përforcua më tej brenda Grupit BALFIN pas hapjes së rrjetit të supermarketëve Euromax, rrjetit më të madh të supermarketeve në Shqipëri. Po në vitin 2005 filloi aktivitetin edhe Fashion Group, aktualisht shoqëria më e madhe e shitjeve me pakicë të veshjeve duke përfshirë 10 marka ndërkombëtare si Prenatal, Mango, Springfield, etj. Z. Samir Mane revolucionarizoi tregun e blerjeve me pakicë në Shqipëri duke prezantuar standardet europiane dhe duke edukuar sjelljen e blerësve.

Pas risisë së qendrave tregtare z. Mane nisi një tjetër projekt ambicioz që përfaqëson gjithashtu një risi, Tirana Logistic Park. Ky është i vetmi park logjistik në Shqipëri dhe një ndër më të mëdhenjtë në rajonin e Ballkanit që ofron shërbime të plota logjistike për të gjitha kategoritë e bizneseve. Faza e parë e projektit u përurua në vitin 2013 dhe aktualisht TLP ofron shërbime të plota.

I ndikuar pak edhe nga studimet e hershme për gjeologji-miniera, z. Mane vendosi të ndërmerrte një hap tjetër të guximshëm në biznes. Në fillimin e vitit 2013 ai bleu 100% të aksioneve të shoqërisë më të madhe të nxjerrjes dhe përpunimit të kromit, AlbChrome, duke e shpëtuar nga falimentimi dhe duke ruajtur vendet e punës për më shumë se 850 punonjës. Pas blerjes e gjithë shoqëria AlbChrome iu nënshtrua një rivitalizimi tërësor duke aplikuar standarde të reja në manaxhim, të njëjta si në të gjitha shoqëritë e tjera të Grupit BALFIN. Sot AlbChrome jo vetëm që i shpëtoi falimentimit por falë investimeve në projekte të mëdha si hapja e furrave të reja për prodhimin e ferro-kromit apo hapja e pusit të ri në minierën e Bulqizës është shndërruar në një prej shoqërive më të rëndësishme në industrinë minerale në Europë.

Jo rastësisht z. Mane është konsideruar nga shumë ekspertë të ekonomisë dhe media ndërkombëtare si një nga biznesmenët më të rëndësishëm në rajonin e Ballkanit dhe një nga personat me më shumë ndikim në ekonominë shqiptare.