Konferenca e Vjeshtës në Pogradec, një udhëtim shkencor në thellësitë e kardiologjisë shqiptare

Nga Dr. Leonidha Peppo
Kardiolog

Pogradeci, qyteti që frymëzon me liqenin e tij të qetë dhe atmosferën poetike, u bë para pak ditësh qendra e dijes kardiologjike shqiptare dhe mbarëshqiptare. Në këtë qytet, që ndërthur bukurinë natyrore me kulturën, u mbajt Konferenca e Vjeshtës, një veprimtari tashmë tradicionale, e cila plotëson në mënyrë të harmonizuar Konferencën e Pranverës, duke krijuar kështu një cikël shkencor vjetor në shërbim të kardiologjisë moderne.
Këto dy konferenca dallojnë nga ato që organizohen rregullisht nga Shoqata e Kardiologjisë Shqiptare, sepse përfaqësojnë një model bashkëpunimi gjithëpërfshirës: në to mblidhen mjekë të të njëjtit komb, por të ndarë në tre shtete – Shqipëri, Kosovë, Maqedoni e Veriut – e herë pas here edhe nga Mali i Zi. Një bashkim simbolik i një trungu shkencor që historia e ka ndarë padrejtësisht, por që vullneti profesional e ribashkon në të njëjtën tryezë.
Ky bashkëpunim nuk është thjesht një takim protokollar. Ai mishëron një filozofi që shkon përtej kufijve administrativë: shkëmbim eksperiencash, unifikim praktikash, dhe ngritje e standardeve të mjekësisë kardiovaskulare për të gjithë shqiptarët.

Organizimi dhe drejtimi shkencor
Në qendër të këtij aktiviteti qëndron Shoqata e Kardiologjisë Shqiptare, nën drejtimin e Prof. Mihal Tase, i cili ka krijuar një mjedis besimi dhe bashkëpunimi mes profesionistëve të fushës. Ai i ka dhënë një rol të rëndësishëm organizativ dhe shkencor Prof. Mimoza Lezhës, një figurë e respektuar për kompetencën profesionale dhe aftësinë e saj për të koordinuar ngjarje të tilla madhore.
Një shtyllë e veçantë e kësaj bashkëpunimi është kontributi i kardiologjisë kosovare, ku spikat Prof. Gani Bajraktari – një nga autoritetet më të rëndësishme në rajon, i cili ndër vite ka sjellë në tryezat shkencore përvojë, qartësi konceptuale dhe standarde bashkëkohore në trajtimin kardiovaskular.
Konferenca u zhvillua në dy seanca kryesore, secila me dinamika dhe përqendrime tematike të veçanta.

Seanca e Parë
Lidhja mes mjedisit, fiziopatologjisë dhe strategjive terapeutike
Seanca e parë, e drejtuar nga Prof. Mimoza Lezha, Prof. Mihal Tase dhe Prof. Gani Bajraktari, u përqendrua në tematika të aktualitetit të theksuar, duke reflektuar ndryshimet që sjell koha dhe mjedisi në shëndetin kardiovaskular.

Temat e prezantuara:
1. “Nxehtësia ekstreme dhe ndikimi në sistemin kardiovaskular”
Në një epokë ku ndryshimet klimatike janë kthyer në sfidë globale, kjo temë hodhi dritë mbi mekanizmat e stresit termik dhe rritjen e rrezikut për ngjarje akute kardiake, sidomos te të moshuarit dhe pacientët me sëmundje kronike.
2. “Arteria e heshtur – rrezik për aterosklerozë apo udhërrëfyes për dislipidemitë sipas ESC 2025” – Dr. Naltin Shuka
Një paraqitje e thelluar mbi aterosklerozën subklinike dhe rëndësinë e vlerësimit të riskut të fshehtë përmes teknologjive diagnostike të reja.
3. “Deficiti i hekurit në insuficiencën kardiake” – Prof. Pranvera Ibrahimi
Një temë shumë praktike që theksoi se si mungesa e hekurit përkeqëson cilësinë e jetës dhe prognozën, dhe pse korrigjimi i saj është tashmë standard i trajtimit.
4. “Trajtimi i fibrilacionit atrial me ndërhyrje” – Dr. Ormir Shurdha
Një prezantim mbresëlënës nga një ndër më të aftët interventistë të brezit të ri, që shpjegoi me profesionalizëm teknikat moderne të ablacionit.
5. “Sëmundjet e zemrës” – Prof. Majlinda Cafka
Një ndërhyrje sintetike dhe e qartë mbi patologjitë më të shpeshta, me raste konkrete dhe përmbledhje praktike.
Diskutimet pas referimeve ishin të gjalla, me pyetje, replika dhe debate profesionale që dëshmojnë rritjen e kulturës shkencore të komunitetit kardiologjik.

Seanca e Dytë
Rastet klinike – aty ku teoria takon praktikën
Kjo seancë u drejtua nga Prof. Shpend Elezi (Kosovë) dhe Dr. Naltin Shuka, me pjesëmarrjen e çmuar të Dr. Teftës nga Italia, e cila sjelli perspektivën evropiane të qasjes diagnostike dhe terapeutike.

Momente kryesore:
1. Rasti i Dr. Endri Horjës
Një histori klinike e jashtëzakonshme: një pacient me kardiomiopati të dilatuar përfiton përmirësim të ndjeshëm të funksionit të zemrës pas heqjes kirurgjikale të një cisti.
Ky rast tregoi fuqinë e vlerësimit multidisiplinar dhe diagnostikimit të saktë.
2. “Ndërlikimet e procedurave koronare me SAK” – Prof. Mimoza Lezha
Një analizë e qartë dhe e guximshme mbi komplikacionet e angioplastikës koronare, me vlerë të lartë praktike për çdo interventist.
3. “Ekografia e zbrazët për zhvillimin e rrugëve aksesore simptomatike” – grupi i Dr. Ormir Shurdha
Një temë delikate që përfshinte edhe sindromën Brugada, një çrregullim potencialisht fatal, i zbuluar pas përdorimit të Propafenonit.
Një rast studimi që theksoi rolin e kujdesit në zgjedhjen e terapisë antiaritmike.
Seanca e dytë ishte më tepër praktike, e mbështetur në raste reale dhe analiza të detajuara, duke e bërë tepër të vlefshme për mjekët e rinj dhe specialistët me përvojë.

Mbështetja farmaceutike – një partneritet i domosdoshëm
Konferenca u mbështet nga një sërë kompanish ndërkombëtare farmaceutike, të cilat prej vitesh kontribuojnë në përmirësimin e cilësisë së trajtimit kardiologjik në vend.

Veçanërisht u dalluan:
Novartis – me programet e saj të edukimit dhe produktet moderne, përfshirë përfaqësuesit e palodhur Orgesa, Liljana dhe Alba;
Berlin Chemie, Menarini Group, Payami, Trepharma,
Bayer, me preparatin Xarelto, tashmë standard në parandalimin e trombozave;
Intermed, Viatris, Dompe, Novo Nordisk e të tjera.
Kontributi i tyre nuk kufizohet te mbështetja logjistike: ai ndihmon në përditësimin e njohurive shkencore dhe sjelljen e teknologjive të reja terapeutike.

Përmbyllje
Një takim që forcon bashkëpunimin dhe zgjeron horizontet shkencore
Pjesëmarrja në këtë konferencë ishte një përvojë profesionale dhe njerëzore e pasur. Mjekë nga të gjitha trevat shqiptare u mblodhën për të shkëmbyer dije, për të përmirësuar praktikën e përditshme dhe për të reflektuar mbi të ardhmen e kardiologjisë.
Për mua personalisht, ishte një kënaqësi e veçantë ta ndaj këtë ditë me miqtë e mi të vjetër, Dr. Gëzim Hakrama dhe Dr. Matjan Kapaj, njerëz me të cilët më lidh një rrugëtim i gjatë profesional.
Konferenca e Vjeshtës në Pogradec la pas një mesazh të qartë:
E ardhmja e shëndetësisë ndërtohet me bashkëpunim, dije, transparencë dhe përkushtim ndaj pacientit.
Me dëshirën e fortë për një të ardhme më të mirë, më të unifikuar dhe më të përparuar shkencërisht,