Kontrabandë me lojërat elektronike, zbulohet mashtrimi prej 1 milion eurosh i dy pronarëve

Administratorët e dy kompanive të lojërave të fatit, Gjovalin Ndoja dhe Paulin Preçi, janë dënuar me burg në mungesë, pasi Prokuroria e Tiranës dhe Dogana kanë zbuluar kontrabandën e kryer prej tyre  me një dëm ndaj shtetit në mbi 1 milion euro.

Burimet zyrtare njoftuan se “Prokuroria e Tiranës ka nisur hetimin në bazë të disa materialeve referuese të D.P.Doganave, pas dyshimeve të krijuara se administratorët e kompanisë blinin pajisje “lojëra elektronike” në Gjermani dhe Slloveni dhe i deklaronin pranë autoriteteve doganore me shifra shumë herë më të ulta blerjeje, me qëllim shmangien e taksave doganore.

Në bazë të veprimeve hetimore të Prokurorisë Tiranë rezulton se dy administratorët e kompanisë, në funksion të aktivitetit të tyre, gjatë vitit 2011 dhe 2012 kanë blerë një sasi të konsiderueshme makinerish për lojëra fati në kompani të ndryshme në Gjermani dhe Slloveni.

Në thuajse të gjitha rastet, këto blerje janë deklaruar dukshëm shumë herë më të vogla pranë autoriteteve shqiptare, krahasuar me faturat origjinale të blerjes, të cilat janë përftuar në bazë të letër-porosive të Prokurorisë Shqiptare, si edhe kërkesave për ndihmë zyrtate të Drejtorisë së Përgjithshme të Doganave, drejtuar autoriteteve gjyqësore dhe doganore gjermane dhe sllovene.

Rezulton se shtetasi Paulin Preçi, në cilësinë e përfaqësuesit të “Saturn Games”, në vitin 2011 ka realizuar 7 hyrje malli në degën doganore Tiranë, të cilat, nga hetimi, rezulton se janë të gjitha të shoqëruara me dokumente blerjeje të fallsifikuara.

Po ashtu, rezulton se shtetasi Gjovalin Ndoj,  në cilësinë e përfaqësuesit të “Saturn Games”, në vitin 2012, ka realizuar 10 hyrje malli në degën doganore Tiranë, të cilat, nga hetimi, rezulton se janë të gjitha të shoqëruara me dokumente blerjeje të fallsifikuara.

Në bazë të veprimeve hetimore, Prokuroria e Tiranës vlerëson se dëmi i shkaktuar shtetit shqiptar, nëpërmjet shmangies së detyrimeve doganore, nga ana e dy shtetasve të mësipër është rreth 150 milionë lekë të reja (rreth 1 milion euro).(Syri.net)