Sot u mbajt mbledhja e Përgjithshme e Gjyqtarëve të Republikës së Shqipërisë për bllokimin e pagave të gjyqtarëve dhe administratës gjyqësore, ku ata kërkojnë zgjidhje të menjëhershme të situatës. Gjyqtarët theksojnë se vendimi nr. 15/2026 i Gjykatës Kushtetuese është përfundimtar dhe i detyrueshëm për zbatim.
Kryetari i Gjykatës së Lartë, Sokol Sadushi, kërkoi zhbllokimin e menjëhershëm të pagave të gjyqtarëve dhe administratës së gjyqësorit, si dhe shlyerjen e detyrimeve të prapambetura. ”Bllokimi i pagave është i papranueshëm dhe duhet të marrë fund menjëherë. Vendimi i Gjykatës Kushtetuese duhet të zbatohet menjëherë”, u shpreh Sadushi.
Ai theksoi se asnjë institucion nuk mund të kushtëzojë apo relativizojë vendimet e Gjykatës Kushtetuese, duke kërkuar respektimin e kompetencave dhe funksionimin normal të gjykatave. ”Punonjësit e administratës nuk mund të mbajnë mbi shpinë probleme që s’i kanë krijuar”, tha ai, ndërsa shtoi se gjyqtarët do të vijojnë t’u shërbejnë qytetarëve.
”Kushtetuta nuk negociohet. Vendimi përfundimtar nuk pezullohet. Pagat duhet të zhbllokohen, vendimi duhet të zbatohet dhe kjo situatë të marrë fund menjëherë”, përfundoi Sadushi.