Kriza politike- PAA-PR, ftojnë partitë politike parlamentare në një tryezë dialogu

Dy partitë parlamentare të opozitës, Partia Agrare Ambjentaliste dhe Partia Republikane, kanë thirrur sot në orën 20.00 një tryezë dialogu në ambientet e Kuvendit të Shqipërisë, me synim arritjen e një kompromisi për ngërcin e politikës shqiptare për zgjedhjet e 18 qershorit.

Ftesa e bërë nga PAA dhe PR, është mirëpritur teksa është konfirmuar pjesëmarrja nga kryetari i PD-së, Lulzim Basha, kryetari i LIBRA, Ben Blushi, kryetari i LSI, Petrit Vasili, kryetari i PDIU Shpëtim Idrizi, kryetari i LZHK-së, Dashamir Shehu dhe Nard Ndoka i PDK-së.

Takimi i thirrur nga Partia Republikane dhe ajo Agrare Ambientaliste i ka ftuar partitë politike sot në ambientet e Kuvendit për të diskutuar rreth mundësive për zgjidhjen e krizës politike dhe paketës McAllister të rifutur në diskutim nga Zëvendës/Ndihmës Sekretari i Shtetit amerikan, Hoyt Brian Yee, një ditë më parë.

Në ftesën e PAA dhe PR, thuhet se: “Duke konsideruar fakt që SHBA ka ofruar dhe mbështetjen e tyre për zgjidhjen e kesaj krize, ju ftojmë në mënyrë të përbashkët të arrijmë në një marrëveshje, për të garantuar zgjedhje të lira dhe të ndershme”.