Kryeministri Rama në “Flasim Shqip”, rrëfim mbi dhunën e ushtruar ndaj tij në vitin 1997

Kryeministri Edi Rama ndau sot një pjesë nga intervista me gazetaren Rudina Xhunga, e cila ka zhvilluar një bashkëbisedim maratonë me kryeministrin në podkastin “Flasim shqip”.

Në një video të publikuar në rrjetet sociale, Rama rrëfeu momente nga dhuna e ushtruar ndaj tij në janar të vitit 1997.

“Ishte një komunitet ku ‘huri’ kishte fjalën e fundit. Kur gjërat kishin nevojë që të vendoseshin në pikën e tyre përfundimtare, pra pikën mbi “I”, në atë komunitet e vinte ‘huri’… Kam në jetën time, ose në historinë time dy rrahje. Njëra më ka ndodhur në dushet e Pallatit të Sportit “Partizani”, pas një ndeshje me Apoloninë e Fierit. Tjetra pastaj është rrahja që dihet botërisht e janarit ’97, kur më bënë pritë tek rruga që futej për te hyrja e shtëpisë edhe më lanë duke menduar që unë tanimë isha i…”, rrëfen Rama.

Në një edicion ekskluziv jashtë sezoneve të podkastit “Flasim”, Kryeministri iu përgjigj mbi 300 pyetjeve të gazetares Rudina Xhunga, që prekin disa prej çështjeve të aktualitetit.