Kryeparlamentari Peleshi: Bashkëpunimi parlamentar me Austrinë do të vijojë të forcohet

Kreu i Kuvendit, Niko Peleshi zhvilloi një takim me kryetarin Michael Hammer dhe delegacionin e Grupit të Miqësisë me Shqipërinë të Këshillit Kombëtar të Austrisë. Peleshi theksoi marrëdhëniet e hershme të miqësisë mes Shqipërisë dhe Austrisë, të forcuara ndër vite përmes bashkëpunimit politik dhe shkëmbimeve në fusha të ndryshme.

“Shqipërinë dhe Austrinë i lidh një miqësi e hershme, e forcuar ndër vite nga bashkëpunimi politik dhe shkëmbimet në shumë fusha”, theksoi ai. “Mirënjohje për mbështetjen e vazhdueshme ndaj rrugëtimit europian të Shqipërisë”, u shpreh Peleshi.

Ai nënvizoi se bashkëpunimi mes Kuvendit të Shqipërisë dhe Këshillit Kombëtar të Austrisë do të vijojë të forcohet, duke veçuar edhe projektin e përbashkët “Punishtja e Demokracisë”. Sipas Peleshit, kjo nismë përbën një shembull të bashkëpunimit mes dy institucioneve dhe kontribuon në edukimin qytetar dhe demokratik të brezit të ri.