Ksamili po promovohet gjithnjë e më shumë si një nga destinacionet kryesore bregdetare në jug të Shqipërisë, me fokus të veçantë te krijimi i hapësirave publike në plazhe dhe përmirësimi i cilësisë së shërbimeve për turistët vendas dhe të huaj.
Sipas kryeministrit Edi Rama, një nga prioritetet e zhvillimit të bregdetit është garantimi i aksesit të lirë për qytetarët në vijën bregdetare, duke kombinuar hapësirat publike me shërbime të standardeve më të larta.
”Ksamil-Plazhet publike. Hapësira publike me shërbime cilësore dhe akses pa pagesë, duke u ofruar të gjithë vizitorëve një eksperiencë më të mirë buzë detit”,- shkruan Rama, duke theksuar vizionin për një model turizmi më të hapur dhe të aksesueshëm për të gjithë.
Në Ksamil, një nga zonat më të frekuentuara të rivierës shqiptare, ky model synon të balancojë zhvillimin turistik me ruajtjen e hapësirave publike, duke shmangur privatizimin e plotë të vijës bregdetare dhe duke garantuar që çdo vizitor të ketë mundësi të shijojë detin.