Kumbaro: Rritje pagash për mësuesit në 2026, nis projekti i liceut franko–shqiptar në Korçë

Ministrja e Arsimit, Mirela Kumbaro, vizitoi sot shkollën “Raqi Qirinxhi” në Korçë, ku u njoh nga afër me mjediset e institucionit dhe programet pas shkollore.

Gjatë vizitës, Kumbaro vlerësoi historinë dhe traditën e shkollës, e cila lidhet me liceun francez të viteve ’30, duke theksuar se suksesi i saj qëndron tek pasioni dhe puna e mësuesve dhe nxënësve.

“Kjo është një nga shkollat më të vjetra të Korçës. E ndërtuar në vitet ’70, është e pajisur me laboratorë dhe kabinete që i japin jetë gjatë gjithë kohës. Këtu po punojmë për një projekt shumë të veçantë, liceun franko-shqiptar, iniciuar nga kryeministri Edi Rama dhe presidenti francez Emmanuel Macron, që sot ndodhet në një fazë të avancuar,” – u shpreh Kumbaro.

Sipas saj, janë përgatitur kurrikulat dhe programet mësimore, ndërsa puna po vijon për projektin e shkollës së re, që synon të shndërrohet në model kombëtar të ekselencës me diploma të dyfishta, të njohura nga ministritë e arsimit në të dy vendet.

Ministrja bëri gjithashtu të ditur se buxheti i arsimit për vitin 2026 parashikon një rritje të re pagash për të gjithë trupën mësimore.

“Me buxhetin e vitit 2026, qeveria ka parashikuar një rritje pagash prej 3 mijë lekësh në muaj, ose 36 mijë lekë në vit, që vazhdon zinxhirin e rritjeve që kemi bërë ndër vite, sepse mësuesit janë pjesa më e rëndësishme e shoqërisë,” – deklaroi Kumbaro.

Në përfundim të vizitës, Kumbaro njoftoi se investimet në infrastrukturën arsimore do të vazhdojnë edhe vitin e ardhshëm.

Ajo theksoi se gjatë 2026-s pritet mbyllja e 42 kantiereve të shkollave të reja ose të rindërtuara në mbarë vendin.