Ish-kreu i Komisionit Qendror të Zgjedhjeve, Kristaq Kume, e sheh të vështirë rrëzimin e hartës së re territoriale përmes referendumeve lokale. Në një intervistë për Top Channel, Kume iu referua precedentit të vitit 2014, kur kërkesat e 6 bashkive dhe 135 komunave për referendum mbi ndarjen territoriale u rrëzuan nga Kolegji Zgjedhor pas ankimit të Partisë Socialiste.
”Sipas mendimit tim, nismat që mund të realizohen në këtë drejtim janë vështirësi të mundshme, për ta shpënë deri në fund gjënë”, u shpreh Kume. Sipas tij, edhe një tentativë e re nga këshillat bashkiakë apo qytetarët e njësive vendore që kundërshtojnë bashkimin me bashki më të mëdha do të përballej me të njëjtin argument ligjor.
”Kujtoj se ne atë kohë ishin 135 komuna dhe 6 bashki, të cilat bënë kërkesën në KQZ, që problemi, rindërtimi i hartës për këto njësi vendore të trajtohej në një referendum lokal, kërkesa e tyre u pranua nga KQZ, por Partia Socialiste e ankimoi vendimin me Kolegjin Zgjedhor dhe ai e hodhi poshtë këtë vendim të KQZ-së, me arsyetimin se problemi i kufijve, pra i hartës, nuk është çështje që trajtohet nga organet e qeverisjes vendore dhe për pasojë s’mund të trajtohet me referendum lokal”, tha Kume.
Për propozimin e opozitës për një referendum kombëtar, ish-kreu i KQZ-së shprehet skeptik për shkak të mungesës së një ligji të posaçëm. ”Jemi ndër vendet e pakta që nuk kemi ligj të veçantë për referendumet, ndërkohë që këtë na e kërkon Kushtetuta dhe na e kërkon edhe vullneti politik me ndryshimet që kanë bërë në Kodin Zgjedhor, por siç duket ne shkruajmë, por pak veprojmë në realizimin e atyre që shkruajmë”, tha Kume.