“Kutia e Pandorës, AKSHI”, Tabaku: Të zbardhet çështja, përgjegjësia politike shkon deri te kryeministri

Nga Jorida Tabaku

Kutia e Pandorës, AKSHI
Arrestimi i Ermal Beqirit duhet të hapë rrugën për zbardhjen e plotë të një prej skandaleve më të mëdha të qeverisjes socialiste!
Fakti që ai u ndalua jo falë një operacioni të Policisë Shqiptare, por për shkak të pasioneve luksoze të ushqyera nga korrupsioni, zbuloi njëherësh edhe hipokrizinë e Policisë Shqiptare. Ai vulosi një tjetër dështim të një shteti që dhunon qytetarët sepse protestojnë, por mbyll sytë dhe veshët përpara të shumëkërkuarve që abuzojnë me miliarda nga taksat e shqiptarëve.
Arrestimi i Beqirit e rikthen edhe një herë vëmendjen te një prej skandaleve të shumta të qeverisë socialiste; te sistemi i ngritur gjatë 13 viteve nga kjo shumicë, e cila tenderët dhe prokurimet publike ia ka rezervuar një pakice.
Na rikthen te pamjet e një zyre të errët, ku qëndronte një tjetër person në kërkim: Ergys Agasi, zëvendëskryeministri në hije i qeverisë. Një njeri që, përmes fuqisë dhe ndikimit të tij, përcaktonte se kush dhe si duhej ta fitonte një tender në fushën e teknologjisë së informacionit.
Dosja e AKSHI-t tregon se si buxheti i shtetit ishte hakeruar nga brenda. Sipas akuzave të ngritura, Agasi dhe grupi i tij i dyshuar kriminal ishin një prej klaneve që kontrollonin buxhetin e Shqipërisë, rrëmbenin biznesmenë, kërcënonin konkurrentët dhe përcaktonin, sipas oreksit të tyre, destinacionin e fondeve të AKSHI-t.
Kjo dosje ngre gjithashtu pikëpyetje shumë të rënda mbi aksesin dhe kontrollin që ky rrjet mund të ketë pasur mbi të dhënat e qytetarëve shqiptarë.
Prandaj, ndalimi i Ermal Beqirit, përveçse një lajm i mirë për Shqipërinë, nuk mjafton. Ai është vetëm njëra prej këmbëve të një sistemi të madh, me shumë tentakula, që çdo ditë e shfaq më qartë qëllimin e tij përfundimtar: vënien e shumicës nën kontrollin e një pakice.
Nuk mjafton ndalimi i zbatuesve. Duhet të hetohen edhe ideatorët, projektuesit dhe miratuesit: ata që kanë ngritur kartonin, kanë miratuar buxhetet dhe kanë autorizuar e ekzekutuar pagesat.
Ermal Beqiri, Ergys Agasi dhe personat e tjerë të përfshirë në këtë dosje nuk mund të trajtohen si raste të izoluara. Duhet të zbardhet plotësisht nëse kanë pasur mbrojtje, bekim dhe mbështetje politike.
Ky pushtet i ka kthyer fondet dhe favoret publike në instrumente për ruajtjen e pushtetit. Ky është sistemi që ka kapur ekonominë, ka deformuar konkurrencën dhe ka dëmtuar biznesin e ndershëm.
Përgjegjësia politike shkon deri në majë. Arkitekti i këtij sistemi është Edi Rama dhe largimi i tij është hapi i parë drejt çmontimit të tij.