Lamallari në Austri, takim me ministrin e Brendshëm: Forcojmë bashkëpunimin në fushën e sigurisë

Ministri i Brendshëm, Besfort Lamallari, ka zhvilluar një takim me ministrin e Brendshëm të Austrisë, Gerhard Karner. Ky takim është mbajtur në kuadër të pjesëmarrjes në “Europa Forum Wachau”.

Gjatë bisedimeve, dy ministrat diskutuan mbi forcimin e bashkëpunimit mes Shqipërisë dhe Austrisë në fushën e sigurisë, menaxhimit të kufijve, luftës kundër krimit të organizuar dhe koordinimit përballë sfidave të përbashkëta europiane.

“Partneriteti me Austrinë mbetet i rëndësishëm në rrugën tonë drejt integrimit europian dhe në garantimin e më shumë sigurie për qytetarët tanë”, u shpreh ministri i Brendshëm.

Lamallari theksoi gjithashtu se Shqipëria po kthehet gjithnjë e më shumë në një destinacion të preferuar për turistët austriakë dhe për sipërmarrësit që kanë zgjedhur të investojnë në vendin tonë, duke nënvizuar rritjen e marrëdhënieve ekonomike dhe njerëzore mes dy vendeve.