Lojërat Mesdhetare 2026, Gonxhja në Taranto: Risi akomodimi i sportistëve në kroçierën gjigante AROYA

Ministri i Turizmit, Kulturës dhe Sportit, Blendi Gonxhja ndodhet në Taranto të Italisë, së bashku me ekipin shqiptar, në prag të nisjes së Lojërave Mesdhetare 2026.

Përmes një postimi në Facebook, Gonxhja u shpreh se Shqipëria merr pjesë në këtë edicion me një nga delegacionet më të mëdha të sportistëve shqiptarë në historinë e pjesëmarrjes së vendit në Lojërat Mesdhetare, të angazhuar në disa disiplina.

Ministri veçoi si një risi të këtij edicioni akomodimin e sportistëve në kroçierën gjigante “AROYA”, e cila sipas tij “është shndërruar në një “fshat” modern për delegacionet”.

“Ju urojmë shumë suksese sportistëve tanë, paraqitje sa më dinjitoze dhe sa më shumë rezultate të larta e medalje! Me krenari, përkushtim dhe zemrën kuqezi, përfaqësoni Shqipërinë dhe ngrini lart flamurin tonë kombëtar!”, shkruan ministri.

Lojërat Mesdhetare “Taranto 2026” mbledhin në Itali sportistë nga vendet e rajonit mesdhetar, ndërsa Shqipëria synon të jetë protagoniste me përfaqësimin e saj më të madh në historinë e këtij kompeticioni.