Luçiana Kokaj apel protestuesve: Bashkim përtej ndasive, deri në dorëheqjen e Ramës

Në ditën e 38-të, qytetarë të shumtë janë grumbulluar sërish në bulevardin ”Dëshmorët e Kombit” përpara godinës së Kryeministrisë, ku kanë nisur edhe fjalimet e para të aktivistëve dhe protestuesve të pranishëm, duke kërkuar largimin e menjëhershëm të kreut të qeverisë.

Bashkë-organizatorja e protestës, Luçiana Kokaj ka përcjellë një mesazh, duke vënë theksin te domosdoshmëria e unitetit dhe kapërcimi i çdo diference politike apo personale për të arritur qëllimin e përbashkët. “Kam një mesazh për ata që mbështesin protestën, të qëndrojmë të bashkuar përtej ndasive të vogla që mund të kemi. Secili mund të ketë ndonjë difekt, ndaj ju bëj thirrje të gjithëve të qëndrojmë të bashkuar dhe të vijojmë protestën”,-deklaroi Kokaj nga sheshi para Kryeministrisë.

Nga ana tjetër, Kokaj artikuloi kërkesat e qarta të tubimit, duke kërkuar drejtësi dhe ndëshkim për përgjegjësit e situatës në vend. ”Çdo ditë e më shumë deri në arritjen e qëllimit tonë, Rama jep dorëheqjen! Rama në burg, Berisha në burg”,-tha Kokaj, duke rikonfirmuar vendosmërinë e protestuesve për të mos u larguar nga sheshi deri në plotësimin e plotë të kërkesave të tyre.