Luçiano Boçi në Fier: Reforma territoriale 2014 dështoi, pushteti vendor duhet t’u rikthehet qytetarëve

Reforma territoriale e vitit 2014 ka dështuar në përfaqësim, në ofrimin e shërbimeve dhe në garantimin e autonomisë vendore. Këtë deklaroi nga Fieri bashkëkryetari i Komisionit të reformës dhe nënkryetari i Partisë Demokratike, Luçiano Boçi. Sipas tij, një reformë territoriale nuk mund të ndërtohet në zyrat e qeverisë apo mbi variante të paracaktuara politike, por duhet të bazohet tek dëgjimi i qytetarëve dhe nevojat reale të komuniteteve.

“Një reformë territoriale nuk realizohet në zyrat e qeverisë dhe nuk mund të jetë një vendim i paracaktuar politik, siç ndodhi kur u hodhën variante të gatshme. Kjo reformë nuk mund të ndërtohet vetëm teknikisht nga një komision me përbërje teknike dhe politike. Teknikët mund ta kishin shumë të lehtë ndërtimin e një harte, por ajo do të ishte e pamjaftueshme nëse qytetarët nuk do të dëgjoheshin. Unë mendoj se mendimet tuaja do të dëgjohen dhe do të merren parasysh, sidomos nga ana jonë si Parti Demokratike”, u shpreh Boçi.

Në fjalën e tij, deputeti i PD-së Boçi deklaroi se Fieri ka qenë një nga qarqet që nuk e ka pranuar ndarjen territoriale të vitit 2014 dhe se ekzistojnë kërkesa legjitime për një riorganizim të ri administrativ. Ai kujtoi se projekti fillestar i reformës së vitit 2014 parashikonte 46 njësi vendore, por më pas u ndryshua në 61 bashki “për arsye politike”, duke e cilësuar atë një “hartë politike” dhe jo një reformë në funksion të qytetarëve.

Boçi ngriti shqetësimin se reforma ka sjellë dobësim të përfaqësimit lokal dhe mungesë të llogaridhënies, ndërsa diferencat në shërbime mes qendrave urbane dhe zonave rurale janë thelluar. Sipas tij mungesa e një pushteti vendor efikas ka ndikuar në largimin e qytetarëve nga zonat rurale dhe nga vendi.

Ai u bëri thirrje qytetarëve që diskutimi të mos shihet si një debat politik, por si një proces për t’i afruar pushtetin vendor qytetarëve dhe për të ndërtuar bashki më funksionale, me kompetenca të qarta dhe autonomi financiare reale.