Manjani kundër dënimit të Veliajt: Nuk duhet të ishte arrestuar që në krye të herës

Juristi Ylli Manjani ka kritikuar arrestimin e kryebashkiakut të Tiranës, Erion Veliaj, duke argumentuar se masa e sigurisë mund të ndikojë edhe në procesin gjyqësor që po zhvillohet ndaj tij. I ftuar në emisionin “Top Story”, Manjani u shpreh se Veliaj nuk duhej të ishte arrestuar që në fillim. Ai argumentoi se ekzistenca e një mase sigurie mund të krijojë presion mbi gjyqtarët që merren me çështjen.

“Erion Veliaj nuk duhet të ishte arrestuar që në krye të herët, sipas pikëpamjes time. Një gjyqtar që gjykon një akuzë penale, kur nuk ka masë sigurie mbi kurriz, e ka shumë më të kollajtë kur nuk e ka procesin e masës së sigurisë”, deklaroi Manjani. Sipas tij, ndryshimi në trajtimin e çështjeve gjyqësore vihet re edhe në raste të tjera. “Gjyqtarët që gjykojnë dosjen ‘Partizani’ janë shumë më të relaksuar, sepse nuk ka masë sigurie në kurriz”, tha ai.

Manjani u ndal edhe te përdorimi i masës së arrestit me burg, duke shprehur qëndrimin e tij se ajo duhet të përdoret vetëm në rrethana të caktuara. “Nuk kam menduar ndonjëherë që arresti me burg është gjë e mirë, sipas konceptit tim zbatohet ose kur e zë me presh në duar ose kur ka bërë vrasje. Çdo gjë tjetër është e negociueshme”, u shpreh juristi. Ai kritikoi gjithashtu diskursin publik mbi “pandëshkueshmërinë”, duke e lidhur atë me atë që e cilësoi si ndikim të politikës në debatin mbi drejtësinë.

Në pjesën tjetër të diskutimit, juristi komentoi edhe qëndrimet e ardhura nga Parlamenti Europian në lidhje me zhvillimet politike dhe institucionale në Shqipëri. “Për të qenë korrekt, nuk ka menduar dikush për shqiptarët. Ajo që duket dhe është e qartë, është një kauzë që prodhon mjegull dhe mjegulla shkon në favor të ujkut. Nëse duhet të ndërtojmë një diskutim mbi standardet, po standardet mungojnë”, deklaroi ai. Manjani ishte kritik edhe ndaj Parlamentit Europian, për të cilin tha: “Parlamenti Europian është institucioni më papunë në Europë. Nëse je shok i Gaz Bardhit, do flasësh si Gaz Bardhi. Kaq është Parlamenti Europian”.