Marta Kos: Vendet kandidate po japin rezultate, ne duhet të përmbushim detyrimet tona

Shqipëria ka shënuar një tjetër hap në procesin e negociatave për anëtarësimin në Bashkimin Evropian. Qeveria shqiptare dhe Komisioni Evropian zhvillojnë sot në Luksemburg Konferencën e Dhjetë Ndërqeveritare, ku në fokus është mbyllja e kapitullit për ndërmarrjet dhe politikën industriale.

Komisionerja Evropiane për Zgjerimin, Marta Kos, vlerësoi ecurinë e procesit të zgjerimit, duke theksuar se vendet kandidate po shënojnë rezultate konkrete në negociatat me Bashkimin Evropian.

“Ky është një tregues i qartë se procesi i zgjerimit po ecën përpara”, u shpreh Kos.

Sipas saj, gjatë ditës së sotme do të zhvillohen edhe tri konferenca të tjera ndërqeveritare, përkatësisht me Shqipërinë, Moldavinë dhe Ukrainën. Me përfundimin e tyre, numri i konferencave ndërqeveritare të zhvilluara gjatë mandatit të Komisionit aktual Evropian do të arrijë në 22.

Komisionerja theksoi se përparimi i vendeve kandidate duhet të shoqërohet edhe me përmbushjen e detyrimeve nga ana e Bashkimit Evropian, në mënyrë që institucionet evropiane të jenë të përgatitura për anëtarësimin e anëtarëve të rinj.

“Jam shumë e kënaqur, sepse kjo tregon se vendet kandidate po japin rezultate, por edhe se ne duhet të përmbushim detyrimet tona, në mënyrë që të jemi në gjendje ta menaxhojmë procesin”, deklaroi Kos.

Ajo nënvizoi se momenti aktual, kur procesi i zgjerimit po ecën përpara, duhet të shfrytëzohet për përgatitjen e Bashkimit Evropian për pranimin e anëtarëve të rinj.

Mbyllja e kapitullit për ndërmarrjet dhe politikën industriale përbën një tjetër etapë në rrugën e Shqipërisë drejt anëtarësimit në BE, ndërsa vijimi i negociatave mbetet i lidhur me përmbushjen e kritereve dhe detyrimeve të procesit të integrimit.