Sot mbahet në Gjykatën e Posaçme gjyqi për kryebashkiakun Erion Veliaj.
Mesohet se kryebashkiaku nuk do të marrë pjesë në seancën e gjyqit në themel.
Veliaj nuk paraqitet te ky gjyq për arsye se ka deklaruar më parë që “pa e nxjerrë nga kafazi i xhamtë” nuk do të paraqitet në seancë. Veliaj përfaqësohet nga avokati i tij, Plarent Ndreca.
Gjykata: Erion Veliaj ka dijeni për seancën e sotme. Ai ka bërë me dije se është njoftuar për seancën dhe deklaron se dëshiron të përfaqësohet nga avokati Plarent Ndreca, i cili është i pranishëm. E pandehura Ajola Xoxa nuk është e pranishme, por përfaqësohet nga avokatët e saj.
Avokati i Ajola Xoxës: E pandehura ka shprehur qëndrimin e saj, duke bërë me dije se më 29 qershor ka lindur me operacion cezarian dhe, për këtë arsye, nuk mund të komunikojë lirshëm. Për rrjedhojë, ajo kërkon shtyrjen e seancës, duke iu referuar Kushtetutës për të drejtën e nënës, si edhe Kodit të Punës dhe ligjit për sigurimet shoqërore, të cilët parashikojnë leje lindjeje prej 63 ditësh.
Deklarata e Ajola Xoxës, e lexuar nga avokati i saj: “Unë kërkoj të jem vetë e pranishme në gjykim dhe kërkoj pezullimin e shqyrtimit deri në përfundimin e lejes 63-ditore që më garanton ligji.”
SPAK: Avokati i të pandehurës kërkoi pezullimin e shqyrtimit gjyqësor deri në përfundimin e lejes së lindjes. Kodi i Procedurës Penale nuk parashikon pezullimin e gjykimit për këtë shkak. Nga ana tjetër, e pandehura shpreh dëshirën për të qenë vetë e pranishme. Është fakt se gjykimi ka nisur në shtator dhe e pandehura nuk është paraqitur në asnjë seancë. Nëse gjykata e çmon të arsyeshme, mund të ndajë çështjen në ngarkim të Ajola Xoxës nga ajo e të pandehurve të tjerë.
Avokati i Xoxës: Presim që gjykata të shprehet. Vetë dispozitat ligjore e lejojnë pezullimin e gjykimit. Ka raste, për shembull, kur caktohet një ekspert ose kur i pandehuri ka probleme shëndetësore dhe shqyrtimi gjyqësor pezullohet. Në rastin e një nëne që ka lindur me operacion cezarian dhe është me raport mjekësor, si çdo nënë në këtë situatë, ligji kërkon që seanca të shtyhet dhe gjykimi të pezullohet. Nëse gjykata vendos ta ndajë çështjen nga të tjerat, ne mendojmë se kjo nuk i shërben ekonomisë gjyqësore.
Avokati Maks Haxhia: Për ta saktësuar, ne kërkojmë pezullimin e të gjithë procesit gjyqësor deri në përfundimin e lejes së lindjes së Ajola Xoxës.