Ministrat Lamallari dhe Gonxhja inspektojnë masat e sezonit turistik në Sarandë: Siguri për qytetarët, zero paligjshmëri

Ministri i Brendshëm, Besfort Lamallari, ministri i Turizmit, Kulturës dhe Sportit, Blendi Gonxhja dhe drejtori i Policisë së Shtetit, Skënder Hita, inspektuan në Sarandë masat e marra për mbarëvajtjen e sezonit turistik.

Në fokus të kësaj vizite ishte garantimi i sigurisë për qytetarët dhe turistët, menaxhimi i flukseve të shtuara dhe bashkëpunimi mes institucioneve për një sezon turistik të sigurt dhe cilësor.

“Jemi në kulmin e sezonit veror, një sezon që karakterizohet nga shifra shumë pozitive, jo vetëm sa u takon hyrjeve të vizitorëve të huaj, por, në radhë të parë, edhe shifrave që lidhen me sigurinë dhe mirëmenaxhimin e sezonit. Kjo nuk vjen rastësisht, por si pasojë e gatishmërisë dhe përkushtimit të Policisë së Shtetit dhe organeve të qeverisjes vendore. Shifrat tregojnë se jemi në nivelet më të mira të mundshme”, u shpreh ministri Gonxhja.

Ministri Lamallari theksoi se rritja e numrit të turistëve sjell edhe më shumë përgjegjësi për Policinë e Shtetit, duke vlerësuar punën e punonjësve të policisë në garantimin e jetës dhe sigurisë së qytetarëve dhe vizitorëve.

“Ne kemi tre mesazhe kryesore si Ministri e Punëve të Brendshme. Së pari, siguria e jetës së qytetarëve dhe e turistëve. Sa më shumë ata vijnë e vizitojnë jo vetëm Sarandën, por gjithë bregdetin shqiptar, kjo nënkupton më shumë përgjegjësi për Policinë e Shtetit.

Do të lejojmë zero paligjshmëri, qoftë në kuptim të aktiviteteve kriminale, paligjshmërive të ndryshme, ato që kanë të bëjnë me sigurinë rrugore. Kurdoherë që kërkohet ndihmë nga qytetarët, reagimi i shpejtë, i menjëhershëm i Policisë së Shtetit është kritik, është i rëndësishëm”, theksoi Lamallari.

Ndërkohë kryepolici Skënder Hita, deklaroi se forcat e rendit janë çdo ditë në terren për garantimin e sigurisë në Sarandë dhe zonat turistike.

“Saranda është një qytet që e do rendin dhe sigurinë. Në kuadër të këtyre veprimeve ne jemi çdo ditë në terren. Falenderoj punonjësit e policisë që punojnë me përkushtim dhe ndershëmri gjatë sezonit turistik”, tha Hita.