Autostrada Tiranë-Durrës do të vijojë të mbetet pa pagesë për përdoruesit, ndërsa në këtë aks po vijojnë ndërhyrjet infrastrukturore për të lehtësuar trafikun dhe përmirësuar qarkullimin. Ministri i Energjisë dhe Infrastrukturës, Enea Karakaçi, thotë se aktualisht nuk parashikohet vendosja e pagesës për këtë segment rrugor.
”Për sa kohë që financimi i punimeve po bëhet nga buxheti i shtetit, patjetër do të vazhdojë të jetë pa pagesë”, u shpreh ministri. Ai bëri të ditur gjithashtu se po vijojnë punimet për përmirësimin e qarkullimit në aksin Tiranë-Durrës, me fokus te zona e Rinasit, ku është identifikuar një pikë ngushtimi e trafikut.
Sipas tij, pjesë e ndërhyrjes është shembja e mbikalimit ekzistues në Rinas dhe ndërtimi i një të riu me katër korsi, si dhe vazhdimi edhe me rreth 2 kilometra të tjerë i korsive shtesë në vijim të segmentit. ”Po vijojnë punimet pas mbikalimit të Rinasit. Pjesë e kontratës është shembja e mbikalimit të Rinasit, krijimi i një mbikalimi të ri me 4 korsi dhe vazhdimi me 2 km të tjerë i korsive shtesë që janë duke u punuar”, tha Karakaçi, duke shtuar se këto ndërhyrje synojnë lehtësimin e trafikut në këtë aks.
