Ministri Lamallari: Operacioni në Priskë, sprova e parë e vullnetarëve kundër zjarrit nga Illyrian Guard

Operacioni për përballimin e zjarreve në Priskë ka shënuar edhe angazhimin e parë në terren të vullnetarëve të parë kundër zjarrit nga Illyrian Guard, në mbështetje të strukturave që po punojnë për izolimin dhe shuarjen e flakëve.

Ministri i Punëve të Brendshme, Besfort Lamallari, përmes një postimi në rrjetet sociale, ka ndarë pamje nga operacioni në Priskë, ku vullnetarët e Illyrian Guard iu bashkuan zjarrfikësve, Policisë së Shtetit dhe Forcave të Armatosura në përpjekjet për mbrojtjen e jetës dhe pronës.

”Bashkë me zjarrfikësit, Policinë e Shtetit dhe Forcat e Armatosura, ishin në betejë me flakët për të mbrojtur jetën dhe pronën e njerëzve. Angazhimi dhe solidariteti i tyre janë një ndihmë e çmuar për ekipet që po luftojnë prej ditësh me flakët, në terrene të vështira dhe nën temperatura ekstreme. Vazhdojmë krah për krah me guxim dhe vendosmëri për neutralizimin e çdo vatre”,-shkruan Lamallari.